"Челси" қишки ҳамда умумий трансферлар бўйича энг кўп пул сарфлаган клубга айланди

Лондон жамоаси "Атлетико"дан ярим ҳимоячи Жоау Феликсни 11 миллион евро эвазига ижарага олди.

Transfermarkt маълумотларига кўра, "Челси" янги ўйинчилар учун 355,49 миллион евро сарфлади, бу бошқа клублардан кўра кўпроқ саналади. Бу кўрсаткич бўйича иккинчи ўринни “Манчестер Юнайтед” (240,32 миллион евро), учинчи ўринни “Вест Хэм” (182 миллион евро) эгаллаб турибди.

Феликснинг трансфери "Челси"нинг қишки трансфер ойнасидаги тўртинчи трансфери бўлди. Ушбу трансфер ойнаси даврида ҳам лондонликлар энг кўп пул сарфлаган - 73,5 миллион евро. Португалиялик ҳужумчи билан шартнома имзолашдан аввал “кўклар” Бенуа Бадьяшилни 38 миллион еврога, Андрей Сантосни 12,5 миллион еврога ва Давид Фофанани 12 миллион еврога сотиб олганди.

Қишки мавсумда трансфер харажатлари бўйича иккинчи клуб Коди Гакпони 42 миллион еврога сотиб олган "Ливерпуль" ҳисобланади.