Championat.asia ҳамда Transfermarkt Ўзбекистон Суперлигасининг май ойидаги энг яхши мураббийи ва футболчисини аниқлади

Суперлиганинг май ойидаги энг яхши мураббийи Вадим Абрамов бўлди. Унинг қўл остида Самарқанднинг “Динамо”си тўртта ўйиндан учтасида ғалаба қозонган бўлса, бир марта дуранг ўйнади. "Динамо" айни дамда Ўзбекистон чемпионатида 22 очко билан учинчи ўринни эгаллаб турибди. Айни вақтда самарқандликлар захирасида битта ўйин бор ва ғалаба қозонган тақдирда чемпионатда пешқадамлик қилаётган "Насаф" билан очколарини тенглаштириб олиши мумкин. Респондентларнинг 45 %и Абрамовга овоз берган бўлса, иккинчи ўрин "Пахтакор" бош мураббийи вазифасини бажарувчи Камолиддин Тожиевга насиб этди (40 %).

Игорь Сергеев май ойида Суперлиганинг энг яхши футболчисига айланди. "Пахтакор" форварди аллақачон апрель ойи натижаларига кўра энг яхши деб топилганди. Шу тариқа Сергеев кетма-кет иккинчи ой бу сўровномада ғалаба қозонди. 32 ёшли ҳужумчи май ойида 4 ўйин ўтказиб, 4 та гол урди, шунингдек, Ўзбекистон Суперлигасининг энг яхши тўпурарлари рўйхатини ҳам бошқариб турибди (11 ўйинда 9 та гол). Сергеев 40% овоз тўплаган бўлса, иккинчи ўринни ОКМК вингери Хуршид Ғиёсов (25%) эгаллади.