"Цементчи" иккинчи босқичга тайёр

Абдумалик Хакимов жамоасида давралар оралиғида катта ўзгаришлар юз берди. Иккинчи босқичга йўл олган жамоа ўз таркибини бир қанча тажрибали ўйинчилар орқали кучайтириш эришдилар. Биринчи даврада "Бухоро" жамоаси шарафини ҳимоя қилган дарвозабон Фарруҳ Турдалиев, 2011 йили Мексика майдонларида юртимиз шарафини муносиб ҳимоя қилган ёш ўйинчимиз Давлатбек Ёрбеков (“Косонсой”), "Нефтчи" жамоаси вакиллари Нодирхон Камолов, Жаҳонгир Дадабоев ва Абдуллажон Мирзаев, "Қўқон-1912" жамоасидан Даврон Маматов ҳамда "Оқтепа" шарафини ҳимоя қилган Иброҳим Нўмоновлар билан клуб шартномалар имзолади.

Биринчи босқичдан кейин жамоа сафини бир қанча ўйинчилар тарк этишди. "Машъал" жамоасидан ижарага олинган Шерзод Абдураимов яна Муборакка қайтган бўлса, Шердор Туранов, Рустам Абдуҳамитов ва Хожимурод Насриддиновлар иккинчи лига вакили "Футбол-Инфо" жамоаси сафига бориб қўшилишди. Ўйинчилардан яна Акмалий Раҳимзода, Нодир Аминжонов, Маъмур Қосимов, Ислом Хошимов, Аслиддин Соипов ва Улуғбек Исмоилжонов жамоа сафини тарк этишди. Бу футболчиларнинг кейинги фаолиятларига омад тилаймиз.