Бугун футбол. "Сўғдиёна" - "Навбаҳор"

Мавсум бошидан бери ғалаба қозона олмаётган "Сўғдиёна"да ўтган турдан кейин бош мураббий ўзгарди. Александр Мочинов истеъфо бериб, унинг ўрнига Сергей Лушан янги бош мураббий этиб тайинланди. Бугун Лушан "Сўғдиёна" устози сифатида ўз дебютини ўтказади.

Биласизми? "Сўғдиёна" Суперлигада ҳали ғалабага эришмаган иккита жамоадан бири бўлиб турибди. Жамоанинг тўплар нисбати ҳам бирмунча хунук кўринишда 1-10. Бугун Сергей Лушан вазиятни ўзгартиришга ҳаракат қилиб кўради. Аммо бу осон бўлмайди, негаки "Навбаҳор" ҳозир анча яхши ўйин кўрсатмоқда.

"Навбаҳор" ҳам ўйин, ҳам таркиб борасида рақибдан устун. Қолаверса, "Навбаҳор"нинг легионерлари кучли, "Сўғдиёна"да эса хорижлик ўйинчи йўқ.

Факт: "Навбаҳор" охирги икки турдан бери ғалаба қозона олмаяпти. Жамоа сафарда "Қўқон-1912" га имкониятни бой берган бўлса, ўз майдонида "Насаф" билан дуранг ўйнади.

Факт: "Сўғдиёна" охирги уч учрашувни қаторасига мағлубият билан якунлади ҳамда ўз дарвозасидан 8та гол ўтказиб юборди.