Бугун футбол. "Металлург" - "Қизилқум"

Навоийда кечган биринчи давра ўйинида "Металлург" 2:1 ҳисобида зафар қучган. Бугун "Қизилқум" уйдаги мағлубият тасодиф эканини сафарда исботлашга ҳаракат қилса керак.

Бугунги баҳс меҳмонлардан кўра мезбонлар учун муҳимроқ. Чунки "Металлург" кучли олтиликка киришга ҳаракат қиляпти. "Қизилқум" шундоқ ҳам тепага кўтарила олмайди. "Металлург" эса кучли олтиликка кириб олиши учун навбатдаги икки баҳсни ғалаба билан тугатишига тўғри келади.

"Металлург" ўз майдонида охирги тўртта ўйиндан бери мағлуб бўлгани йўқ. Бу жамоа икки мартадан ғалаба ва дуранг қайд этди. Бекободликлар уйда "Локомотив" ва "Нефтчи"ни мағлуб этиб, "Насаф" ҳамда "Бунёдкор" билан дуранг ўйнади. Жамоа охирги марта 11-турда ўз майдонида АГМКга ютқазиб қўйган.

"Қизилқум" ҳақида гапирадиган бўлсак, бу жамоа сафарда шу пайтгача 10та ўйинда майдонга тушиб, шундан учтасида ғалаба қозонган. "Қизилқум" сафарда "Сўғдиёна", "Қўқон-1912" ва "Нефтчи"ни мағлуб этиб қайтган. Жамоа иккита дуранг ўйнаб, беш марта мағлуб бўлган. Тўплар нисбати 8-14.

Биласизми? "Қизилқум" охирги бешта турнинг тўрттасида мағлубиятга учради. Ҳамиджон Актамов шогирдлари Фарғонада ғалаба қозонишдан ташқари "Бунёдкор", "Пахтакор", "Бухоро" ва АГМК билан кечган ўйинларда ютқазиб қўйди.