Бугун футбол. "Бухоро" - "Пахтакор"

Бугун шубҳасиз Бухорода жуда қизиқарли баҳс кечиши кутилмоқда. Чунки иккинчи ўрин учун курашаётган "Пахтакор" учун бу ниҳоятда муҳим учрашув ҳисобланади. "Насаф"нинг кечаги ғалабасидан кейин бугун "Пахтакор" ҳам фақат ғалабани кўзлаб майдонга тушиши турган гап, бироқ "Бухоро" анча жиддий рақиб. 

Биламизки, "Бухоро" ўз майдонида анча яхши футбол намойиш этади, қолаверса, стадионга кўплаб мухлислар ташриф буюришади. Бугунги беллашувга ҳам 10 мингдан зиёд ишқибоз ташриф буюриши кутилмоқда. 

"Бухоро" иккинчи даврани яхши ўтказяпти дея оламиз. Шундай бўлдики, жамоа қаторасига тўртта ўйинда ғалаба қозониб, жадвалда ҳатто иккинчи ўрингача кўтарилиб олди. Аммо кетма-кет учта дуранг "Бухоро"ни бешинчи ўринга "михлаб" қўйди. "Пахтакор" эса Шота Арвеладзе қўл остига ўтгач, бирин-кетин ўз очколарини йиға бошлади. 

Биласизми? "Бухоро" иккинчи даврада ҳали мағлубиятга учрамади. Жамоа ҳисобида бешта ғалаба ва тўртта дуранг бор. "Пахтакор" эса бир марта ютқазиб қўйди. Сафарда "Бухоро" билан 3:3 ўйнаб қайтган "Навбаҳор" ўз майдонида "Пахтакор"ни мағлуб эта олди. Умуман олганда, "Пахтакор" иккинчи даврада бешта ўйинни сафарда ўтказган бўлса, шундан иккитасида ғалабага эришиб, икки бор дуранг ўйнади ва битта учрашувда мағлуб бўлди. 

Факт: "Пахтакор" йил бошидан бери сафарда фақат учта ўйинда ғалаба эришган. Жамоа "Обод", "Металлург" ва "Локомотив"дан устун келган.