Бу ўша - “тилла соатли” ҳакам

Ўйинни Марат Исмоилов бошчилигидаги ҳакамлар бригадаси бошқариб борди. Унга қанотларда Маъмур Саидқосимов билан Андрей Цапенко ёрдам беришди. Шундай бўлдики, биринчи таймда “Бунёдкор” ҳисобни тенглаштиришга муваффақ бўлди, бироқ Самир Бекрич томонидан киритилган голни ҳакамлар ҳисобга олишмади. Аниқроғи, қанот ҳаками Андрей Цапенко ўйиндан ташқари ҳолат бўлди дея байроқчасини кўтаргани боис гол инобатга олинмади.

Аммо бу вазиятда ҳеч қандай офсайд йўқ эди ва майдон эгаларининг голи қоидага мувофиқ киритилганди. Лекин Цапенконинг хатоси туфайли ҳисоб тенглашмай қолди. Натижада учрашув назоратчиси Радик Серазетдинов томонидан қанот ҳакамига 4,0 балл (яъни, икки баҳо) қўйилди. Энди Цапенко уч-тўрт ўйинга четлатилади. Бу ҳакам ҳозирда лайнсменлик билан шуғулланаётган бўлса-да, ўз вақтида бош ҳакамлик ҳам қилган. Хусусан 2010 йил ўтказилган ўсмирлар терма жамоамизнинг Дукентдаги ўртоқлик баҳсида у секундомерли соатини уйда қолдириб келгани учун футбол профессори Рустам Акрамовнинг “тилла соати”ни тақиб майдонга тушган ва ўйинни бошқариб борганди. Шундан кейин Акрамовнинг “тилла соати” ҳам, Цапенконинг ўзи ҳам машҳур бўлиб кетганди.

Х.Холиқов.