Бироз камтарроқ бўлинг

Журналист ундан интервью олар экан, ярим ҳимоячига Германия суперкубогининг «Боруссия» (Дортмунд)га қарши ўйинидаги бир ҳолатни эслатди. Ўшанда Рибери ўзини ушлаб қолмоқчи бўлган Роберт Пасслакнинг юзига чап қўли билан икки марта зарба бериб, камига тирсаги билан бошига туртишга ҳам улгурган ва атиги сариқ карточка билан жазоланганди. Франк мазкур вазиятга изоҳ берар экан, ўзини ҳеч нимани билмаганга солиб, қуйидаги жумлаларни айтди: «Ҳа, фаолиятимда бундай ҳолатлар ҳам бўлиб туради. Ахир мен жуда ҳиссиётли, кучли инсонман. Мен бунда ҳеч бир ёмон жиҳатни кўрмаяпман. Энг муҳими, ким эканимни дўстларим яхши билишади: мен улкан қалб соҳиби бўлган яхши йигитман».

Орадан бир неча кун ўтгач, Алексис Санчес ҳам ОАВда бош мавзуга айланди. Гап шундаки, чилиликлар ЖЧ-2018 саралаши учун бўлган баҳсда Боливия билан нурсиз дуранг қайд этишди ва ўз имкониятларини сезиларли даражада пасайтириб юборишди. Шунда мухбирлар футболчига қалтис савол беришди: «Алексис дунёнинг энг кучли футболчилари қаторида юришига нима халал беряпти?» Шунда Санчес уларга антиқа жавоб қайтариб, барчани ҳайратга солди. «Мен ҳеч кимга ҳавас қилмайман ва ҳеч бир футболчидан кам эмасман. Ўзимни Месси ва Роналдулар даражасидаги футболчи деб биламан. Чунки менинг имкониятларим уларникидан асло қолишмайди».

Тўғри, бундай олифтагарчиликни Риберидан кутиш мумкин, аммо доим камтар футболчи сифатида танилиб келган Санчеснинг юқоридаги гаплари унда ҳам манманлик иллати борлигини кўрсатмоқда. Бу эса Алексиснинг ўзини яхши кўрадиган қуйидаги футболчилар қаторига қўшилишини таъминлади.

Криштиану Роналду

«Мен сўнгги 20 йилликдаги энг кучли футболчиман, - деганди Криштиану Роналду Италия нашрларидан бирига берган интервьюсида, - ва бу ўзимнинг фикрим эмас. Бу ҳақда менинг натижаларим гапиради». Барчага яхши маълумки, Криштиану ўзининг ютуқларига жуда юқори баҳо беради. Аммо камтарликдан асар ҳам бўлмаган юқоридаги гаплар Мессидан тортиб Зидангача бўлган жуда кўп футболчиларнинг ғашига тегиши табиий.

Эслатиб ўтамиз, аввалроқ, яъни португалиялик футболчи ҳақида махсус ҳужжатли фильм яратилганда, Роналдуга савол беришди: «Нега энди бош қаҳрамон ролига Месси эмас, айнан сизни танлашди?» Криштиану эса жавоб берди: «Негаки, фильм ижодкорлари дунёнинг энг яхши футболчисини қидиришганди». Ҳа, Роналдунинг Лионелга муносабати ўзгача. Бироқ шундай фитнали савол берган журналист ҳам ҳурматга арзимайди.

Месси ҳақида яна бир ёндашув: «Эҳтимол, сиз энг яхши сифатида Мессини танларсиз?! Аммо мен ўзимни ундан устунроқ биламан. Умуман олганда, рақобатимиз каминани заррача ташвишга солмайди. Ахир, мен энг яхши бўлганимдан кейин, бу ҳақда бош қотириб нима қиламан?!» Жуда «камтарона» сўзлар-а?

Яя Туре

Очиғини айтиш керак, Яя Туре шунчалик машҳурлашиб кетгани учун агенти Дмитрий Селюкка алоҳида миннатдорчилик билдириши керак. Чунки Селюк ўз мижози манфаатларини ҳимоя қилишда шундай ибораларни ишлатадики, ҳайрон қоласиз. Туренинг ўзи ҳам баъзида агенти каби қизишиб кетади.

Масалан, ўтган йилги Англия чемпионатидаги муваффақиятсиз стартдан кейин у аламини журналистлардан олди ва бир неча йиллик гинасини ошкор қилиб қўйди: «Сизлар менинг «Барселона»ни ташлаб, бу ерга келганим ҳақида эмас, қанча маош олишим ҳақида ёзасизлар, холос. Бу - шармандалик! Ахир, мен «Сити» совринларни ютиб олишига кўмак бериш учун бу ерга келганман. Бироқ қачон шу ҳақда оғиз очсам, барингиз кулишни бошлайсизлар. Мен - Яя Туре жамоа ўйинини қанчалик ўзгартира олишимни эса бирортангиз тушуна олмайсиз».

Шу воқеадан кейин ҳам Туре бир неча бор ўзини камситилгандек тутди: унинг туғилган кунида клуб торт тортиқ қилмаганида, Африканинг энг яхши футболчиси деб топилмаганда ва ҳоказо. Ваҳоланки, бунгача у ушбу совринни кетма-кет тўрт йил ҳеч кимга бермаганди...

Хуллас, Туре унинг услуби кўпчиликка ёқмаслигини яхши билади. Қизиғи шундаки, унда жавоблар доим тайёр. «Ўзимга ҳаддан ортиқ бино қўйганманми? Яхшиси, бу саволга Мануэль Пеллегринининг сўзлари билан жавоб бераман. У менинг ўйинимдан қониққан пайтларда айтардики, дунё фақат уч нафар қора танлини ҳурматга лойиқ деб билади: Мартин Лютер Кинг, Нельсон Мандела ва Яя Туре. Мен унинг ҳазилини юксак қадрлайман».

Марио Балотелли

Ўз-ўзига баҳо бериш лозим бўлса, унча-мунча буюк футболчилар Балотеллининг олдида ип эшолмай қолишади. 2012 йилнинг ёзи: «Фақат Месси мендан кучлироқ. Аммо фарқ унчалик катта эмас». Орадан бир йил ўтгач, Марионинг «рўйхати» бироз кенгайди ва «сал кучлироқ»лар сафидан Месси, Златан ва Роналдулар ўрин олишди.

Берлускони Италиянинг энг зўр футболчиси сифатида Кассанони тан олишини айтганда эса Марионинг асаби бузилди: «Ё у мен ҳақимда ҳали билмайди ёки Сильвио адашди». Таъкидлаш лозим, бу гап 2011 йилда, Балотелли «Милан»га ўтиши олдидан айтилганди. Супер Марионинг ҳазиллашиш учун топган вақтини қаранг...

Златан Ибрагимович

Агар бу ёруғ оламда манманлар клуби бўлганида ва Ибрагимович унинг аъзоси саналганда, аниқки, Златанни бошқаларга ҳурматсизлик учун жамоадан ҳайдаб юборишарди. Златан ўзини ҳаммадан - футболчилардан, мураббийлардан, тадбиркорлардан, овчилардан, хуллас, бутун дунёдан устун қўйишига исбот керак бўлса, унинг ҳар бир сўзига эътибор бериб, кузатиб юринг.

«Мен асл винога ўхшайман: йилдан-йилга ўткирлашиб боравераман».

«Париждан кетаётганимда бирдан ёмғир қуйди. Ҳаттоки, осмон ҳам кетишимга чидай олмади».

Булар - сўнгги ёздаги гаплар, холос. Агар Ибра ҳақида кўпроқ билмоқчи бўлсангиз, «Менсиз ўтадиган жаҳон чемпионатида кўрадиган ҳеч вақо бўлмайди» каби гапларга дуч келасиз. Дарвоқе, «Арсенал» кўриги билан боғлиқ кўҳна воқеа ҳам жуда ажойиб. Айтишларича, «Мальмё»да ўйнаётган 19 ёшли ўсмир «канонирлар» вакиллари фақат «кўрик учун» келишганини билгач, кийимларини ҳам алмаштирмай, уйига қайтиб кетган экан.

Пеле ва Марадона

Миллионлар ўйини тарихида энг буюк инсонларни эсламасак, рўйхатимиз тўкис бўлмасди. Боз устига, ўз-ўзини мақташдан Пеле ҳам, Марадона ҳам сира тортинмаганлар. Ҳарқалай, кимсан - футбол қироли Пеле: «Мен Мессидан анча кучли бўлганман, ахир камина ҳар иккала оёқда бир хил ўйнардим», деб турса, бошқалардан нимани ҳам кутиш мумкин?!

Марадона эса ўзининг барчадан устунлигини имкон бўлди дегунча, такрорлашдан чарчамайди. «Тушунмайман, қачонгача ким кучли экани ҳақида тортишиш мумкин? Пелеми ёки мен? Исталган одам албатта, мени танлайди-да!»

«Пеле ўйнаган пайтларда ҳимоячилар майдонда шунчаки, қозиқдек қаққайиб туришган. Бундай ҳолатда урилган голларнинг қадри бўладими?!»

«Агар Пеле ўзини футболнинг Бетховени деб билса, демак мен футболдаги Рон Вуд ва Кит Ричардс (дунёга машҳур The Rolling Stones гуруҳи) эканман».

Мана шунақа гаплар... Айтганча, Лео Месси - Марадонанинг «илҳоми»ни келтирадиган кишилардан бири. 1986 йилги жаҳон чемпиони Аргентина терма жамоасининг ҳозирги етакчисини тез-тез нишонга олиб турмаса бўлмайди. Хуллас, Марадонанинг идеал иқтибосларидан бири: «Ҳа, мен Мессидан кўра кучлироқман. Пеледан эса икки карра зўрман». Қойил...

Исроил РАҲИМОВ тайёрлади