Азамат Абдураимов: "Толибжонов нима учун яна "Андижон" - "Пахтакор" учрашувига тайинланганини билмайман"

"Биринчи ўйин биз учун байрам эди. Фаолиятимда биринчи марта мен бошқараётган жамоа ўйинини кўриш учун стадионга шунча одам келди. Бугун мағлуб бўлдик, лекин учрашув тугагач мен йигитларга ўйин учун раҳмат айтдим. Ҳали барчаси олдинда. Мухлисларни янги мавсум билан табриклайман. Бизни қўллаб-қувватлаб туришгани учун раҳмат айтаман.

Расковни алмаштиришга сабаб Искандеров бизга биринчи бўлимда бизга катта ташвиш туғдирди. Шу боис битта ҳужумчи ўрнига Бекзод Ғозиев майдонга туширдик.

Кечаси билан ёққан ёмғир майдон ҳолатини жуда ёмон ҳолга олиб келди. Шу боис комбинациялар ташкил қилишда қийинчиликка дуч келдик.

Олим Толибжоновни нима учун яна "Андижон" - "Пахтакор" учрашувига тайинланганини билмайман. Биз 2012 йилги мавсумдаги тарафкашлик қилиб бошқарганини ёдга олиб ПФЛга хат билан мурожаат қилдик. Аммо бу хат эътиборсиз қолди. Иккинчи марта бу ҳакам "Пахтакор"га қарши ўйинда Андижонда ишлади... Иккинчи бўлимда пенальти берилмади, бу ерда менимча бу тоза пенальти эди.

Бугун ҳакамлар туфайли мағлуб бўлагнимиз йўқ. Маҳаллий футболчилар доим таркибда бўлишган, бундан кейин ҳам бўлади. Лекин олий лигада фақат андижонлик футболчиларни ўйнатиш мажбурияти йўқ. Ким ўйинга тайёр бўлса ўша ўйнайди. Агар маҳаллий футболчиларни майдонга тушираверсам ва биринчи лигага тушиб кетсак мухлислар келиб раҳмат дейишмайди, натижа ҳам муҳим. Масалан, Абдураҳимов ўзини кўрсатмоқда ва асосий таркибда ўйнамоқда. Ўз майдонимиздаги кейинги ўйинни "Машъал"га қарши ўтказамиз. Ўша ўйинга барчани таклиф қиламан", - дейди Азамат Абдураимов.


Исломбек Рустамбеков ёзиб олди