Андрей Микляев: "Ғалаба қозониш ҳар доим ёқимли"

- Камдан-кам ҳолларда бир жамоа билан кетма-кет икки марта дуч келинади. Бугун деярли тенг ўйин гувоҳига айландик. Балки жамоалар ярим финал жавоб баҳси олдидан ўз карталарини очишни исташмагандир. Шу боисдан ўйин томошабоп бўлмади. Бугун бироз омадимиз чопди ва ғалабага эришдик. Ютиш ҳар доим ёқимли ва бу кайфиятни кўтаради. Футболчилар бугун мураббийлар штаби кўрсатмаларини тўлиқ бажаришди.

- Иккинчи бўлимда чемпионат тўпурари Абдухолиқов ўрнига аслида марказий ҳимоячи бўлган Ислом Тўхтахўжаевни ҳужумга қўйдингиз. Терма жамоада эса Ислом Тўхтахўжаевни бош мураббий қанот ҳимоясида ўйнатади.
- Темурхўжа Абдухолиқов узун мавсумни ўтказди ва олдинда бизни муҳим баҳс кутмоқда. Шу сабабдан Абдухолиқовга дам олиш имконини яратиб бердик. Ислом Тўхтахўжаев ўтган йиллардаги мавсумларда ҳам бу позицияда ўйнаган ва ҳужумчи ролида ёмон ҳаракат қилмайди. Бугун Исломни ҳужумга қўйишимизни вазият тақозо этди. Абдухолиқовни ўрнига Тўхтахўжаевдан бошқа футболчини қўйишнинг имкони йўқ эди.

- Нега энди, Марат Бикмаев ёки Қувондиқ Рўзиевни ҳам ҳужумга қўйса бўлардику? Ислом Тўхтахўжаев кўп гол уради, ҳа. Аммо у барибир марказий ҳимоячи саналади. Масалан Рамос ҳам кўп гол уради. Лекин "Реал"да ундан ҳужумчи сифатида фойдаланишмайдику.
- Тўғри, Ислом Тўхтахўжаев ҳужумчи эмас. Шунчаки бугун бошқа чорамиз қолмаганди. Қувондиқ Рўзиев эса узоқ муддатли жароҳатидан сўнг энди майдонга қайтди. Ҳа айтганча, ундан Мирзаевга голли узатма амалга оширгани аслида пас эдими ёки дарвоза томон берилган зарбамиди, шуни сўраш ёдимдан чиқибди.

- Артур Геворкян бугун марказий ярим ҳимояда ўйнади...
- Ҳа, бугун биз Артур Геворкянни ушбу позицияда кўришни истадик. Қандай ўйнади? Менимча, яхши. Ҳар ҳолда Геворкян марказда ўйинни бузиб қўйгани йўқ.

- Бу йилги ёдингизда қолган энг яхши учта учрашувни санаб бера оласизми?
- Асосан ОЧЛ доирасидаги ўйинларни айтишим мумкин. Умуман олганда қайсидир бир ўйинни ажратиб кўрсатиш қийин. Ҳар бир учрашув биз учун муҳим бўлди. Айниқса мавсум охирига келиб қолса ҳар қандай баҳс асабий ўтади.


- Жорий мавсумдаги энг яхши учта футболчиси деб кимларни айтган бўлардингиз?
- Мен ўзимни жамоамдаги футболчиларни алоҳида ажратиб кўрсатмайман. Уларнинг ҳаммаси энг яхшилар. Ҳужумда Элдор Шомуродов, ярим ҳимояда Жалолиддин Машарипов ва ҳимояда Юрица Бульят. Дарвозада эса Игнатий Нестеровни қайд этган бўлардим.