Алиқулов: "Биз "Реал"га қарши ўйнамадик..."

— Қаторасига 2-марта кубокка эга чиқдингиз. Қанақа ҳиссиётлар ўтяпти?

— Жуда ҳам хурсандман. Кайфият аъло. Бунга эришиш осон бўлмади. Барча мухлисларни ғалаба билан табриклайман. 

— Финал ҳақидаги фикрларингиз қандай?

— Ўйин ажойиб муҳит остида ўтди. Шунақа атмосферани яратиб берган мухлисларга ташаккур. Рақибни яхши ўрганган эдик. Шу боисдан барча вазиятларда эътибор билан ўйнадик.

— "Навбаҳор"нинг асосий ижрочиларига деярли имконият берилмади. Мураббий ким биландир индивидуал тарзда ўйнашни айтганмиди?

— Йўқ, ҳеч кимни персонал равишда қўриқлаш топширилмаганди. Биз "Реал Мадрид"га қарши ўйнамадик. Шунинг учун бунга ҳожат ҳам йўқ эди.

— 2-тайм охирида ҳужумга чиқиб кетдингиз. Бу ишни "Насаф"ни натижа қониқтирмаётган паллаларда доимий равишда қиласиз. Бунча маҳорат қаердан?

— Бу жараён устида машғулотда ишлаган эдик. Менда гол уриш хоҳиши жудаям кучли. Исталган ишни иштиёқ билан қилсангиз, натижага эришиш осон бўлади. 

— Мухлислар ярим тун бўлишига қарамай, жамоани Қаршида ажойиб тарзда кутиб олишди (видео). Бунақа атмосфера исталган футболчининг орзуси бўлса керак...

— Ҳа, шаҳарга кириб келганимизда муҳит ажойиб эди. 10 мингга яқин одам бизни кўчада кутиб олди. Ҳоким бобомиз ҳам футболга яхши эътибор беряптилар. Уларнинг барчасига раҳмат.

— "Насаф" тарихидаги биринчи чемпионликка жуда яқин турибсизлар. 3та ўйин қолди. Қайси рақиб нисбатан мураккаброқ?

— Менимча, уччала ўйин ҳам қийин ўтади. Энг мураккаб рақиб сифатида "Олимпик"ни кўрсатган бўлардим.

— Сизга "Пахтакор" қизиқаётгани ҳақида айтишди. Ростан ҳам "шерлар"дан таклиф бўлдими?

— Мен ҳозир таклифлар билан қизиқаётганим йўқ. Бор эътиборим чемпионатга қаратилган. Худо хоҳласа, Суперлигани ҳам ютайлик. Ана ундан кейин таклифларни ўрганишимиз мумкин...

Муаллифнинг телеграмдаги канали → ФР| футбол АНАЛИЗИ