Александр Лобанов: "Мени мақсадим, миллий терма жамоа бош мураббийининг эътиборига тушиш"

- Янги мавсумга қай даражада тайёргарлик кўряпсизлар?

- Биз мавсумга жиддий тайёргарлик кўряпмиз. Умид қиламанки чемпионат стартини яхши бошлаймиз. Барча футбол мухлислари ва футболчилар расмий ўйинларни соғинди.

- Ҳозир БААда машғулот ўтказяпсизлар. Ўртоқлик ўйинлари режалаштирилганми, қайси клубларга қарши ўртоқлик ўйини ўтказасизлар?

- Рақибларни мураббийлар танлашади, биз кимга қарши ўйнашимизга унчалик қизиқмаймиз. Игорь Сергеев жамоасига қарши назорат учрашувини ўтказдик. Ушбу баҳсда йирик ҳисобда ғалаба қозонишимиз мумкин эди. БААнинг яна икки жамоасига қарши ўртоқлик учрашуви ўтказамиз.  

- Сизнингча бу йилги чемпионат қай даражада қизиқарли бўлади?

- Бу йилги чемпионат баҳслари аввалгиларига қараганда қизиқарли ўтади, деб ўйлайман. Мусобақа иштирокчилари ва чемпионат форматига ўзгартириш киритилди. Шунинг учун ҳам ҳар бир ўйинда жиддий кураш кечади. Бу эса чемпионатимиз савияси ўсиши учун ёрдам беради. рақобат қанчалик кучли бўлса футбол ҳам шунчалик тез ўсишга эришади.

- Ўзбекистон миллий терма жамоасига Темур Кападзе вақтинчалик бош мураббий бўлди. Бунга қандай фикр билдирасиз?

- Аввалам бор Темур Кападзега мураббийлик фаолиятида омад тилайман. Мени фикримча, ундан яхши мураббий чиқади. Терма жамоада бироз ишлаш имкониятини ҳар кимга ҳам беришмайди.

- Кеча МТЖнинг вақтинчалик бош мураббийи кенгайтирилган таркибни эълон қилди. Лекин терма жамоа таркибидан сиз ўрин олмадингиз. Бунга қандай муносабат билдирасиз?

- Бу МТЖда вақтинчалик ишлаётган бош мураббийининг қарори. Мени мақсадим, миллий терма жамоа бош мураббийининг эътиборига тушиш. Бу ҳақида муҳокама қилишни истамайман. Ҳар кимни ўз қараши бор.

Жаҳонгир Сотволдиев суҳбатлашди