“Келишилган ўйинлар қироли”. VI боб

Давоми. Боши қуйидаги ҳаволаларда:

“Келишилган ўйинлар қироли”. IV боб

“Келишилган ўйинлар қироли”. IV боб (давоми)

“Келишилган ўйинлар қироли”. V боб

“Келишилган ўйинлар қироли”. V боб (давоми)

“Келишилган ўйинлар қироли”. VI боб

Нима ҳам қилардим. Жамбожумбонинг сиёсати менга ҳам аксини кўрсатганди. Каттароқ пул ишлаш учун ўзим ишлашим зарур. Қамалиб чиққанимдан сўнг дунё тезда ўзгараётганини тушунгандим. Муҳим нарсалар интернет орқали бўлиб ўтаётганди. Дўстларим ҳам энди телефон орқали эмас, интернет орқали “ставка” қўя бошлагандилар.

2007 йилнинг сентябрида Хитой аёллар ўртасидаги ЖЧни қабул қилди. Биз Тан ва Яп билан яна африкаликларга мурожаат қилдик ва Нигерия терма жамоасининг иккита футболчисини кечки овқатга таклиф қилдик:



-   Мен футбол агентиман. Европада тўп суришни истамайсизларми? Ноутбукингиз борми? Қўл телефонингизчи? Истайсизми, мен сизларга совға қиламан!

Улар менинг совғаларимни қабул қилишди. Бу улар мени полицияга топшириб юбормасликларининг кафолати эди. Агар иш ўхшамаса – қўл телефонини йўқотиш катта йўқотиш эмас. Биз улардан дарвозабон билан келишишни сўрадик. Дарвозабон биз билан ишлашни истамади. Қизлардан бири олдимизга келди:

-   Дарвозабоннинг айтишича, сиз унга Грециядаги Олиммпиада вақтида ҳам таклиф билан чиққан экансиз...

-   Бўлиши мумкин эмас. Мен ҳеч қачон у билан учрашмаганман.

Мен Палнинг 2004 йилги Олимпиадада иш қилганини эсладим. У бизни адаштирди шекилли. Биз уларга 4 та ноутбук ва 4 та мобил телефони совға қилдик.

-   Яқинда Шимолий Корея билан ўйнайсиз. Ютқазишни истамайсизми?

Улар рози бўлишди. Биз гаров сифатида 60 минг доллар қолдирдик.

Нигерия терма жамоасига 1,5 фора беришаётган эди. Лекин, Яп ва Тан кўпроқ ишлашни истадилар ва 2,5 га “ставка” қўйдилар. Улардан учта тўп фарқи билан мағлуб бўлишни сўрадилар. Биринчи бўлимдан сўнг ҳисоб кореяликлар фойдасига 2:0. Иккинчи бўлимда улар тўпни ўзларида назорат қилиб юришди ва дарвоза томон умуман зарба бермадилар. “Ставка”миз ютмади.

-   Пулни улардан қайтариб олишинг лозим, - деди Тан.

-   Аҳмоқмисан? “Ставка” фақат биринчи бўлим учун ва ўйиндаги ғалаба учун эди. Қизлар фақат тўп фарқида адашишди. Улар ҳам нимадир олишлари лозим.

Тан ўзининг ишлари билан бошқа шаҳарга кетганди. Мен эса Яп билан хонада ўтирардик. Мен пастга тушиб қизлардан пулни олишим лозим эди. Лекин, ундан ҳам яхшироқ нарса ўйлаб топдим. Ташқарида божхонадаги бир йигитни учратиб қолдим. У 500 доллар эвазига хонамизга киришга ва шу гапни айтишга рози бўлди: “Мен сенларни нима иш қилаётганларингни биламан. Агар 5 минутдан сўнг кетмасаларинг полиция чақираман”.

Мен хонага Япнинг олдига қайтиб ўша болага қўнғироқ қилдим. У яхши актёр чиқиб қолди ва мен сўраган нарсани қойилмақом қилиб ижро этиб берди. Яп қўрқиб кетганди ва  қўрқиб қочиб кетди. Мен хонада қолдим ва қизларнинг олдига кирдим:

-   40 мингни ўзингизда олиб қолинг. 20 ни эса қайтариб беринг. Учта гол ўтказа олмадинглар.

Кейинги куни Яп билан бошқа шаҳарда учрашдик.

-   Яхшиям бизни тутиб олишмади, - хурсанд бўлди Яп.

Кейинги куни Сингапурга қайтдим ва ЖЧ тақвимини қараб чиқдим. Гана терма жамоаси Норвегияга қарши ўйнаши керак эди. Африкаликлар гуруҳдан чиқиш учун барча имкониятни қўлдан чиқаришганди. Норвегия эса кучли ўйин кўрсатарди.

Ганалик бир қизга қўнғироқ қилдим: “Турнирдан чиқиб кетдинглар ва уйга бир тийинсиз қайтасизлар. Мен билан эса 75 минг ишлаб олишингиз мумкин”. У рози бўлди ва дугонаси билан гаплашди. Танишим билан бирга Гана делегацияси истиқомат қилаётган Ганжу шаҳрига жўнаб кетдим. Отелда барча бизга шубҳаланиб қарай бошлаганди. Хонага чиқаётганимизда эса ортимиздан иккита одам келаётганди:

-   Бу ерда нима қиляпсизлар? Ҳужжатларингизни кўрсатинг.

Улар полициячилар эди. Наҳотки қизлар бизни сотишган?

-   Мен футбол агентиман. Аёллар ўртасидаги ЖЧни кузатяпман.

-   Бу ерда шунинг учун юрибсизми? Ишонмайман. Ташрифдан мақсадингиз нима?

-   Бу ерда яхши футболчиларни қидириб юрибман.

-   Бу ерда нима қилаётганингизни биламиз. Бу ердан кетинг.

Улар бизни ва паспортларимизни суратга олишди. Сингапурга қайтиб кетдик. Гана эса 2:7 ҳисобида ютқазди. Нима учун улар пулдан воз кечишди?
Ноябрда эса Вьетнамда 23 ёшли футболчилар ўртасида АгриБанк Кубоги ўтказиладиган бўлди. Зимбабве ФАдагиларнинг ўзлари менга мурожаат қилишди. Мен Тандан уларнинг келишига пул сўрадим. Лекин, унинг босси буни истамади. Шундан сўнг эса Вьетнам ФА га қўнғироқ қилиб Зимбабвенинг авиачипталарини сотиб олишларини сўрадим. Аҳир улар ҳомийлик пулларини олишган ва барча терма жамоаларнинг ҳаражатларини кўтаришлари зарур. Якунда улар рози бўлишди.
Таннинг босси менга пул беришни истамаган бўлсада, танишим Сиваражни чақирдим. Кейин билсам, Жомбажумбо Тан билан ишлаётган экан.
Мен Жамбожумбонинг хонасига чиқдим. Ундан қўнғироқ қилиб олиш учун деб, телефонини олдим. Ҳаммомга кириб кетдим ва унинг сим картасини ўзимнинг телефонимга қўйиб олдим.

-   Хайр Жамбожумбо.

Япга SMS юбордим: “Салом. Менга битта ўйин учун қанча тўламоқчисан?”

“Уилсон Раж Перумал сен билан гаплашдими?”, - дея жавоб қилди Яп.

“Йўқ”.



Ўйин бошланишига бир соат қолган. Букмекерлик сайтларида эса ҳалиям коэффициентлар қўйилмаган. Стадионга йўл олдим. Трибунада Тан ва Япни мамнун ҳолда учратдим.

-   Нима қиляпсизлар? Ахир бу чемпионатда ишламаймиз дегандингларку. Жамоа билан мен келишганман-ку. Нимага орқамдан иш қиляпсизлар?

Улар менга ташланишди.

SMSни Жамбожумбо эмас, мен жўнатгандим.
Тан Япга қарата:

-   Айтдимку сенга. Бу лаънати биздан ақллироқ.

Барча кулди. Коэффициентлар у сайтда қўйилмади. Зимбабвеликлар қуруқ қўл билан ортга қайтиб кетдилар.

Шундан сўнг Сингапурга қайтиб кетдим ва осойишта яшай бошладим. Пул етарли эди. Шу сабабли, тинчгина кейинги имкониятни кута бошладим. Маҳаллий ўйинларга эътиборимни қаратмасдим. Чунки полиция мени огоҳлантирган. Мен бошқа жойда келишилган ўйинлар ташкил қилиш хавфсизроқ эканини тушуниб етгандим.

2008 йилнинг январида Ганада Африка миллатлари Кубоги бўлиб ўтди. Вазиятни ўрганиш учун ўша ерга учиб бордим. Африка кўчалари бир-бирига ўхшаб кетарди: сизга нималарнидир таклиф қилиб юрадиган тиланчилар. Мен уларнинг меҳнатини ҳурмат қиламан. Эрталабдан кечгача иссиқда пул ишлаш осон эмас. Уларга ачинаман, лекин нима қилиш керак? Нима учун Африка Сингапур даражасига чиқа олмаганига тушуна олмайман. Ахир биздагилар ҳам уларникидан кам бўлмаган коррупция ботқоғига ботган. Лекин, тушунишимча бизникилар халқ ҳақида ҳам қайғурадилар.

Тан билан Яп ҳам Аккрага етиб боришди. Биз алоҳида иш қилардик. Улар Бенин терма жамоаси бош мураббийи – германиялик Райнхард Фабишани сотиб олишга ҳаракат қилардилар. Ушбу ҳаракат ҳақида газеталар ҳам ёзиб чиққандан сўнг ортга чекинишга мажбур бўлдилар.
Мен Намибия терма жамоаси билан бир отелда истиқомат қилардим. У ерда делегациянинг бир неча вакиллари билан танишиб қолдим. Хонам Атель исмли дарвозабоннинг хонасига қарама-қарши жойлашганди. Ундан саволларимга жавоб ололмадим. Унинг қулоғи кар эканлигини кейинроқ билиб қолдим. Нима қилсам бўлади? Унга қоғозда ўзимга керакли бўлган ҳисобни ёзиб бердим. У билан чиқишиб кетгунимча Намибия терма жамоаси футболчиси Колин Бенжамин расмий шахсларни чақириб устимдан арз қилди. Менга отелни тарк этишим зарурлигини айтишди. Ўша куннинг ўзида Тан ва Яп билан биргаликда Аккрадан учиб кетдим.

Сингапурга қуруқ қўл билан қайта туриб газетада Малайзияда бўлган халқаро турнир ҳақида ўқиб қолдим. У Хитойдаги турнир олдидан 23 ёшли футболчилар ўртасидаги ўзига хос тайёргарлик мусобақаси эди. Уни маҳаллий “Октаго” номли компания ташкиллаштирганди. Ўшанда Малайзия ФА вакиллари мени “Октаго” вакили сифатида тасаввур қилгандилар. Турнир бошланишига икки ой қолганида стол атрофига йиғилдик. Шунда мен таклиф қилдим:

-   Мен агентман. Африкаликлар билан муносабатим яхши. Турнирга иккита Африка терма жамоасини олиб келишим мумкин.

Улар менинг таклифимни таклиф қилдилар. Назаримда, улар турнирга Зимбабвени эмас, Нигерия, Гана каби терма жамоаларни олиб келади деб ўйлагандилар. Хизматим учун 150 минг ринггит олдим. Ушбу пулларни эса АПЛ ўйинларида ютқазиб қўйдим. Келишилган ўйинлар ташкил қилиш учун пулим қолмаганди. Шу сабабли шерик қидириш билан шуғулландим. Бунда менга акам ёрдам берди. У мени Дан Тан билан иш олиб борган Муруган билан таништириб қўйди. Мен унга режаларимни тушунтириб бердим. Жамоанинг авиачипталари учун пул керак эди. Лекин Дан Тан пулни букмекерлик сайтлари билан ишлайдиган бир хитойликка қарзга берганди. У орқали миллиардлаб доллар даромад келарди.  

Сайтлар ўйиннинг ҳалоллиги борасида кўп ҳам қайғурмасди. Махсус дастурлар ёрдамида агар қайсидир ўйинга катта пул тикилса, коэффициентларни пасайтириб юборардилар. Хитойликда пул жуда кўп эди. Мен ўз хизматларим учун 80 минг доллардан олишни сўрагандим. У рози бўлди. Мен янги ҳомий топгандим.
Нигерия терма жамоаси Олимпиадага йўл олган ва ўртоқлик учрашувлари улар учун зарур эди. Нигериялик таниш агент менга футбол федерациясининг шартномасини тақдим этди. Улар турнирда қатнашишга розилик билдирганди.

Иккинчи жамоа эса Гана эди. Биз улар билан электрон почта орқали узоқ вақт музокара олиб бордик. Улар аввалига рози бўлишди. Кейин эса ҳал қилиш учун бироз вақт сўрадилар. Ганага учиб боришга тўғри келди. У ерда мени бош котиб кутиб олди:

-   Сизга 23 ёшли терма жамоа зарурми?

-   Ха.

-   Афсуски, Олимпиадага йўлланма олмаганимиз учун жамоани тарқатиб юборганмиз.

-   Бошқа жамоа тузинг.

-   Вақт кам-ку.

-   Ок, яна кўришамиз, - дедим.

Иккинчи жамоани қаердам топсам бўларкин-а? Яқинроқ ва менга таниш бўлган давлатлардан бири Того эди. Ломага учиб бордим. Ҳар қадамда плакатларга кўзим тушарди: “Гиёҳванд моддалар олиб юрманг”. Бу нарса Сингапурда ҳам жиддий муаммо. Агар 15 грамм наркотик модда олиб юрсанг сени ўлим жазосига ҳукм қиладилар. У ерда сенинг майда олиб-сотар ёки наркобарон эканлигингга қараб ўтиришмайди. Бир мамлакатда бемалол марихуана чекиб юришса, бошқасида бу нарса учун ўлим жазосига ҳукм қиладилар. Ўлимга ҳукм қилинган маҳкум қариндошлари билан учрашади, суратга тушади, кечки овқатни тановул қилади. Ундан сўнг эса осилади...

Того пойтахти Ломада маҳаллий футбол ассоциациясининг бош котиби билан учрашдим.

-   Менга жамоа керак.

-   Бизда 23 ёшли терма жамоа йўқ.

-   Сиз шунчаки футбол ўйнашни биладиган ва Того терма жамоаси либосида тўп суришга ҳаққи бор одамларни йиғинг.

-   Бизда 17 ёшлилар ўртасидаги ЖЧда қатнашган жамоа бор. Уларни чақирсак ҳам бўладими?

-   Ҳа, бўлади.



Мен Малайзия ФАга Тогонинг Сингапурга Амстердам орқали учиб борганини хабар қилдим. Сингапурда мени Мега кутиб олди. Йўлда газета орқали Сингапур бир неча кун олдин ЖЧ-2010 саралашида Ливан терма жамоасини қабул қилгани ҳақида ўқиб қолдим. Демак, ливанликлар ҳозир аэропортда. Мега машинани ортга қайтарди ва биз уларнинг олдига жўнаб кетдик...

(Давоми бор...)

Азиз Тўхтамуродов таржимаси