“Келишилган ўйинлар қироли”. V боб

Яна қамоқдаман. Яқинларим ҳам мендан узоқлаша бошлашди. Отам бир мартагина кўришга келди. Сингилларим янги йил олдидан келиб туришарди. Фақат онам доимий равишда олдимга келарди. Кейин эса ўзим уларга кўп ҳам келавермасликни илтимос қилдим.
Онам менга янгиликларни айтиб турса-да, ташқарида нима бўлаётганидан бехабар эдим...

Қамоқдан 2006 йилнинг май ойида чиқдим. Озодликка чиқишимга бир неча ҳафта қолганида мени бошқа блокка ўтказишди. У ерда телевизор кўришга ва янги газеталарни ўқишга руҳсат бериларди. У ерга иш берувчилар келиб, турли хил ишларни таклиф қилишарди. Лекин у ишларнинг маоши жудаям кам эди.

Қамоқдан чиқиш фақатгина битта эшик орқали бўларди. Эшик олдида дўстлар ва қариндошлар кутиб туришарди. Мен онамга кутиб олишга чиқмасликларини тайинладим. Мен ёш бола эмасман. Шунчаки, ташқарига чиқиб тоза ҳаводан тўйиб нафас олишни истагандим. Ташқарига чиққанда эса укамни кўрдим. Ҳаа, барибир келибди. У билан бирга дўстларимдан бири Мега турарди.
Мен эски дўстларимни унчалик ҳам хушламас эдим. Уларни барча кўнгилсизликларимга сабабчи сифатида кўрардим. Мега ўзгармаганди: бўйи ўзун, озғин, кўзойнакда турарди. У билан 21 ёшимда танишганман. Шу сабабли кўп ҳам ишонавермасдим. Мега ақлдан озар даражада кетма-кет “ставка”лар қўярди. У шаҳар уюшмасида ишларди. Мени машинасида уйимга олиб бориб қўйди.
Панжара ортидаги тўрт йилдан сўнг озодликнинг жуда ҳам қадрига етар экансан. Мен муаммоларсиз яшашни истардим. Чекмадим, ичмадим. Кунлик чиқимим 5 доллардан ҳам ошмасди: бир чашка кофе ва газета. Кофе ичиб, хаёл суриб ўтирардим. Мега эса ён қўшним эди.

Кунлардан бир куни у гап бошлаб қолди:

-   Уилсон, мен йигитлар билан гаплашдим...

-   Йўқол!

Мега Сингапур лигасида иштирок этувчи янги “Спортинг Африка” номли жамоанинг футболчилари билан иш қиларди. У ерда хорижлик футболчиларга ўйнашга руҳсат бериларди. Маҳаллий тадбиркор Колин Чи африкаликларни йиғиб жамоа тузганди.
“Спортинг” футболчилари ойига атиги 100 сингапур доллари олишарди. Бундай маош учун яшаш мумкин эмас. Улар замонавий қулларни эслатиб юборарди. Мега жамоа футболчиларидан бири билан алоқада эди. Кунлардан бир куни у мени “Спортинг”ни ўйинини кўриш учун стадионга олиб борди.

-   Уилсон, нима деб ўйлайсан? Бу йигитлар билан пул ишлаш мумкинми?

Биринчи бўлимдан сўнг иккита футболчини кўрсатдим:

-   Уларни кўряпсанми? Улар жамоанинг асосий футболчилари. Ўшалар билан келишишни маслаҳат бераман.

Футболчиларнинг исми Оби ва Фил эди. Иккита марказий ярим ҳимоячи. Уларсиз жамоа ҳеч нарса қила олмасди. Икки кундан сўнг Мега Фил билан келишиб олди ва менинг олдимга келди:

-   Мен Фил билан учрашмоқчиман. Бирга борасанми?

Мен келишувлар ташкилотчисилигимча қолгандим. Пул қолмаганди. Шу сабабли Мега билан бирга иш қилишга тўғри келди.

-   Бораман. Лекин, иштирок этмайман. Мен бошқа столда ўтираман. 

-   Яхши.

Биз кофехонада учрашдик. Мен улардан бир неча метр узоқда ўтирардим. Суҳбат тугаганидан сўнг Мега олдимга келди:

-   Фил рози бўлди. Энди нима қилишим керак?

-   У қизил карточка олсин ва кейинги ўйинни ўтказиб юборсин. Шундай деб айт.

Фил пул ишлаб олиш таклифини рад этмади. У ойига 100 доллар олар, Мега эса унга 6-7 минг таклиф қилганди. Фил бу ҳақда Обига ҳам айтган. Мега Филдан қизил карточка олишни сўради. Пассив ҳаракат қилаётган Фил ва Оби билан ўйин бизнинг сценарийимиз асосида кетаётганди. 89-дақиқада Фил қизил карточка олди.

-   У нима қилмоқчи эди? 89-дақиқадаги қизил карточка нима учун керак?, дея асабийлашди Мега.
Дастлабки муваффақиятдан сўнг Мега “Спортинг” футболчилари билан ишлашни давом эттирди. Баъзида у олдимга маслаҳат сўраб келарди. Мен унинг ўйинлари учун “ставка” қўйишга бир оз пул йиғиб қўйгандим. Лекин, ўйинлар муҳим бўлмагани учун биз кўп фойда кўра олмас эдик. Биз 4 ёки 5 та ўйин ташкил қилдик. Ўйинларнинг барчасини стадионда томоша қилардик. 

“Тампин”га қарши ўйинда биз “Спортинг” футболчиларидан ғалаба қозонишни сўрадик. Фил эса бунинг ўрнига қизил карточка ишлаб олди. Биз бу аҳмоқдан қизил карточка сўраганимизда 89-дақиқада зўрға майдондан четлатилганди. Ғалаба сўраганимизда эса у майдондан четлатилди. Биз ютқазиб қўйдик. 

-   Филга кимдир мағлубият учун пул таклиф қилган.

Уни полицияга олиб кетишди. У барчасини тан олди. Полиция унинг телефон қўнғироқларини кузатиб Мегани ҳам топиб олди. Фил эса Мега унинг дўсти эканлигини, пулни унга бошқалар таклиф қилганини айтиб қолди.
Омадимиз келди. Мега мени ҳам ўзи билан тортиб кетиши мумкин эди. Фил эркак бўлиб чиқди ва ҳеч кимни сотмади. Мегани ушлаб ўтириш учун асос қолмаганди. Уни қўйиб юборишди. Лекин, мамлакатни тарк этишни таъқиқлаб қўйишди.

Мавсум ўз якунига етди. “Спортинг” Япониянинг “Ниигата” жамоаси билан ўйнайдиган бўлиб қолди. Мега билан ушбу ўйинга яхшигина пул тикишни режалаштираётган эдик.

-   Биринчи бўлим дуранг, иккинчисида эса битта гол ўтказиб юборинглар, - дея Оби ва Филга кўрсатма бердик. 

Яхши. Лекин, ҳакам ҳуштаги янграганидан сўнг Оби ўзининг одатий ўйинини қила бошлади. У келишувимизга тупурганди. Фил эса аксинча, бизга ёрдам беришга ҳаракат қилар, лекин, гол ўтказиб юбора олмасди. 92-дақиқада японлар барибир гол урди ва 1:0 ҳисобида ғалаба қозондилар. “Ставка”миз тўғри чиққанди. Мени эса Обидан жаҳлим чиқаётганди. Мен қўнғироқларим эшитилмоқда деб ўйлардим. Шу сабабли Обига эмас, Филга қўнғироқ қилдим:

-   Фил, анави аҳмоққа айтиб қўй, у беш эмас, фақат икки олади.

-   Бу сизларнинг ишингиз, - жавоб қилди Фил. У инглизчада жуда ёмон гаплашарди.

Полициячилар қўнғироқларни эшитишган ва Филни яна сўроққа тутишни бошлашганди.

-   Уилсон нима ҳақида гапирди? “Икки” ва “беш”лар нима дегани?

-   Билмайман. Уилсондан сўранглар. Бу Оби ва унинг иши.

-   Унда нимага у сенга қўнғироқ қилди?

-   Билмайман.

Обини чақиришди:

-   Билмайман. Уилсон Филга қўнғироқ қилган. Менга эмас. Улардан сўрайверинг.

Уни менга қўнғироқ қилишга мажбурлашди. Машинада кетаётгандим. Оби менга ҳеч қачон қўнғироқ қилмаган. Ҳар доим мен унга телефон қилардим. Мен суҳбатимизни эшитишларини билган ҳолда гаплаша бошладим.

-   Салом Оби.

-   Менга қачон янги жамоа топиб бермоқчисан?

-   Ҳозир жуда бандман. Бунга вақт зарур. Мен ҳиндистонликлар билан гаплашдим. 1-2 ой вақт керак бўлади.

-   Менга клуб керак.

-   Оби, мен билан ишласанг ишла, бўлмасам катта кўча!

Трубкани жойига қўйдим.

Икки кундан сўнг мени яна ҳибсга олишди. Аввалига ҳеч нарса демасдан камерага “ўтқазиб” қўйишди. 28 соатдан сўнг эса терговлар хонасига олиб чиқишди. Мен у ерда бир ўзим ўтирардим. Бир соатча бир ўзим, бўм-бўш хонада ўтирдим. Ниҳоят офицер кириб келди:

-   Фил, Мега ва Оби ҳақида нималарни биласан?

-   Мен уларга янги жамоа топишга ёрдам беряпман.

-   Нимадан қўрқяпсан? Агар сенинг ҳеч қандай айбинг бўлмаса қўрқма.

Жимман. Офицер чиқиб кетди. Бир оз ўтиб унинг ҳамкасби терговни давом эттирди:

-   Оби барчасини айтди. Унинг кўрсатмалари сени яна қамашимиз учун етарли. Нима учун ўзингни оқламоқчи эмассан?

Уларга мени уриш таъқиқланганди. Шу сабабли, мени психологик томонлама синдиришмоқчи эди. Бу сафар мен ҳеч нарсани тан олмасликка қарор қилгандим.

-   Мен шунчаки футбол агентиман. Нима ҳақида гапираётганингизни тушунмаяпман.

Офицер кулиб юборди. Кейин эса менга яқинроқ келиб сўзлай бошлади:

-   Уилсон, сен нима учун бизнинг ишимизни чигаллаштиряпсан? Сўнгги марта огоҳлантиряпман: Сингапурдан чиқиб кет ва бошқа жойда келишилган ўйинларни ташкиллаштир. Биз ҳам сени таъқиб қилмаймиз.

Яхшиям Оби ва Филга бу тизимда қандай ишлаш зарурлигини тушунтириб қўйганим. Агар мен барчасини тан олганимда мени 10 йилга қамашарди. Битта жиноят билан уч маротаба қўлга тушиш – тамом дегани!
Бу орада эски танишлар – Яп ва Тан пайдо бўлди. Улар билан яна Келвин дегани ҳам ишлай бошлаганди. 2006 йилнинг бошида Германиядаги жаҳон чемпионатида иш қилиш учун мени қидиришган экан. Лекин, мен у пайтда ҳали қамоқда эдим...

(Давоми бор...)

Азиз Тўхтамуродов таржимаси