Браим Диас Африка Кубоги финалидаги мағлубиятдан сўнг узр сўради

"Юрагим оғрияпти. Мен бу совринни қўлга киритишни орзу қилган эдим — сизнинг меҳрингиз, ҳар бир хабарингиз, ҳар бир қўллаб-қувватловингиз туфайли ўзимни ёлғиз ҳис қилмадим. Мен бор кучим билан, энг аввало бутун қалбим билан курашдим. Кеча хатога йўл қўйдим ва бунинг учун тўлиқ жавобгарликни зиммамга оламан. Самимий узр сўрайман. Ўзимга келиш осон бўлмайди, чунки бу яра тез битмайди… лекин ҳаракат қиламан. Ўзим учун эмас, менга ишонган ва мен билан бирга азият чеккан барча инсонлар учун. Бир кун келиб, бу меҳрнинг барчасига жавоб қайтариш ва марокаш халқи учун фахр манбаига айланиш учун олға интиламан", – деди Браим Диас.

Учрашувнинг асосий вақти охирида Браим Диас пенальтидан унумли фойдалана олмади. Шундан сўнг ўйин қўшимча вақтга ўтди ва унда сенегалликлар ягона голни урди. Натижада Сенегал совринни қўлга киритди, Марокаш эса ўз уйидаги финалда мағлуб бўлди. Турнирнинг энг яхши тўпурари сифатида "Олтин бутса"ни қўлга киритган Браим Диас ўйиндан кейин кўзёш тўкди ва қаттиқ руҳий тушкунликда эди.