Юзи қонга беланган ва агентидан нолиган "Динамо"нинг уругвайлик футболчиси билан танишамиз

Мауро Алехандро Брасиль Алкайре 1999 йил Уругвайда таваллуд топган. "Эль Танке Сислей" академиясида таҳсил олган Мауро профессионал дебютини 2017 йил 18 сентябрда ўтказган. Биринчи голини 8 октябрда "Монтевидео Вандерерс"га қарши баҳсда нишонлаган. 2018 йил у "Пеньяроль" билан шартнома имзолади, бироқ унинг кейинги умри асосан ижарада ўтди.

Фаолиятимни "Эль Танке Сислей"да бошлаганман. Кейинчалик жамоа тўловларни амалга оширмагани учун мусобақадан четлатилгач, "Пеньярол"га бориб қўшилдим. Аммо у ерда менга бирор марта ўйин ўтказиш имкониятини беришмади, чунки жуда ёш эканлигимни айтишарди.

Шунингдек, Брасиль "Рампла", "Серро", шунингдек, Мексиканинг "Селая", Чилининг "Кобрелоа" клубларида тўп тепган.

2024 йил бошида Мауро Брасиль собиқ агенти унинг трансфер ҳуқуқини тақдим этиш ва хорижга кетишига рухсат бериш эвазига пул талаб қилаётганини маълум қилди. Бу вазият футболчига шу қадар салбий таъсир қилдики, у руҳшуносга мурожаат қилишга мажбур бўлган.

Мексикада яхши натижа кўрсатдим, агентим Уругвайда бошқа бир жамоа варианти борлигини айтди, мен эса буни хоҳламадим. Шунда "Серро Ларго" президентига қўнғироқ қилиб, агар у мени жамоасида кўришни истаса, ҳозироқ қайтишимни айтдим. Агентим бундан хабар топгач, агар вакиллик шартномасига имзо чекмасам, мени шунчаки майдон атрофида югуриб юрадиган қилиб қўйишини (таркибдан четлатишини) айтди. Агентимга у билан ҳамкорликни бекор қилмоқчи эканлигимни айтганимда, у бунинг эвазига пул талаб қилди. Умримда бунақасини кўрмаганман.

2025 йилнинг май ойидаги "Насьонал" ва "Серро Ларго" жамоалари ўртасида учрашувнинг 35-дақиқасида Мауро Брасиль майдонни тарк этишга мажбур бўлди. Бунга унинг нигериялик ҳужумчи Кристиан Эбере билан тўқнашиб кетиши оқибатида юзидан олган жиддий жароҳати сабаб бўлди. 

Воқеа жойидан олинган тасвирлар кўпчиликни ларзага солди, чунки "Серро Ларго" футболчисининг юзи бир зумда қонга беланди ва унга майдоннинг ўзидаёқ зудлик билан тиббий ёрдам кўрсатилишига тўғри келди. Кейинчалик футболчи операция қилинди, унинг юзига 12 та чок тушган.

ВИДЕО

Ўшанда ўйинни давом эттирмоқчи эдим, аммо жамоадошларим: "Мауро, сендаги юзингдаги ёриқ қанчалик катта эканини билмаяпсан", деб айтишди.

Лукас Родригес тўп оширганда, тўпга интилдим. Эбере сакрашини билардим, чунки кўз қирим билан ёнимда югураётганини кўриб тургандим. Бош билан ўйнашга сакраганимда тирсакларимни ишлатмадим, чунки ҳозирги кунда VAR туфайли бунинг учун майдондан четлатишади. Юқорига сакрадим ва ерга тушишим биланоқ юзимни ушладим, қон оқаётганди ва ўша заҳотиёқ жароҳатланганимни тушундим".

Бошдан зарба қабул қилишга ўрганиб қолганман, аввалроқ бурним ҳам синган эди, шу сабабли қондан қўрқмайман. Хайриятки, майдонда ҳушимни йўқотмадим, ҳаммасини эслай олардим ва ўрнимдан туришим билан "Серро Ларго" шифокори ёрдамга келди.

26 ёшли ҳимоячи 2026 йилнинг январида Самарқанднинг "Динамо" клуби билан бир йиллик шартнома имзолади.

Мауро Брасиль ўз вақтида Уругвай U-20 ёшлар жамоаси сафида 10 та ўйинда майдонга тушган. Шунингдек, у Уругвай маҳаллий терма жамоасига (Уругвай-А) ҳам чақирилган бўлиб, дебютини 2024 йилда Коста-Рикага қарши баҳсда (0:0) ўтказган ва 72-дақиқада огоҳлантирилган.

Ошпаз ва официантликдан футболга. Боаке ҳақида 7 қизиқарли факт

Баскетбол терма жамоасига чақирилган, балиқли майдонда тўп тепган ҳамда Жек Читтак мухлиси

Оқил Абдубарноев тайёрлади.