Ҳамиджон Актамов: "Ғолиблар ортиқча муҳокама қилинмайди"

"Ўйин ҳақида нима ҳам дейишим мумкин? Бугун яна Навоий халқи учун қувончли кун бўлди. Ғалаба билан барчани табриклайман. Ўйинни бизнинг жамоа назорат қилди, вазиятлар яратди. Футболчилар кўрсатмаларимизни тўлиқ бажаришди. Жамоа аста-секин мослашиб бормоқда, ёшлар ҳам ўйиндан-ўйинга тажриба орттириб боришмоқда. Ғолиблар ортиқча муҳокама қилинмайди дейишадику", - дея гап бошлади Ҳамид Актамов.

- "Қизилқум" трансферлар ойнаси вақтида фаол бўлди. Кучли ва тажрибали футболчилар олиб келинди. Бу ўйинга ҳам таъсирини кўрсатди. Қайси омилларга кўра жамоада бу қадар жиддий ўзгаришларга қўл урилди? Ҳомийлар томонидан қўшимча маблағ келдими?
- Йўқ, бу гап ҳомийларда эмас. Ўтган сафар ҳам бу саволларга кўп бор жавоб берганман, келинг шунга жавоб бермай қўя қолай. Жамоани кучайтириш, ҳар бир ўйинда ютиш учун шунақа ўзгаришларга қўл урдик. Ҳомийимиз ўша ўша, ортиқча бошқа ҳомийлардан маблағ келгани йўқ.

- Жамоа кетма-кет икки маротаба ғалаба қозонди. Потенциал жиҳатдан жамоангиз кучли саккизликка кира оладими?
- Ҳозир ҳеч нарса дея олмайман. Очколарни мавсум якунида санаймиз, олдинда ўйинлар кўп. Мавсумни юқорироқда якунлашга ҳаракат қиламиз.

- Кейинги турларда таркибда ротатциялар кўрамизми? Кўряпмиз, аксарият жамоалар бир ҳил таркиб билан ҳаракат қилмоқда. Бунинг натижасида футболчилар чарчаб қолмоқда. Ротацияларни амалга оширган жамоалар ютиб кетмоқда. Сизда бу борада ҳолат қандай?
- Бизда футболчиларнинг ҳолати яхши. Вақтига қараб ротациялар қиламиз. Мана бугун ҳам ёшларни майдонга туширдик. Шу орқали уларни ҳам тайёрлаб борамиз. Футболчиларни жисмоний ҳолати қониқарли. Алишер Саноевнинг жароҳати оғирроқ, шу боис алмаштирдик.