Жўра Хонназаров турнири. “Бунёдкор-2001” кумуш медаллар билан кифояланди

Ушбу қарама-қаршиликда томонлар муросасиз кураш олиб боришди. Ҳужумкор руҳда бошланган ўйинда биринчи бўлиб ҳисобни очиш “қалдирғочлар”га насиб этди. Абзал Бобожонов бирга-бир вазиятда рақиб посбонини алдаб ўтиб, дарвозани аниқ ишғол қилди – 1:0.

Танаффусдан кейин “Пахтакор” футболчилари бор эътиборларини ҳужумга қаратишди. Натижада, марказидан ёриб кирган рақиб футболчиси ҳисобдаги мувозанатни тиклади – 1:1. Бу орада “қалдирғочлар”дан Хумоюн Исломов иккинчи марта ҳакам томонидан огоҳлантирилиб, майдонни эрта тарк этди. Мазкур четлатиш “шерлар” учун айни муддао бўлди. Қолган дақиқаларда янада босимни оширган “Пахтакор” беллашув якунланишига икки дақиқа қолганида ғалаба тўпини киритди.

Шу тариқа, Мурод Отажонов бошчилигидаги “қалдирғочлар” Жўра Хонназаров хотирасига бағишлаб ўтказилган халқаро турнирда иккинчи ўрин билан кифояланишди.

Учинчи ўрин учун кечган баҳсда “Локомотив” футболчилари “Андижон”ни мағлубиятга учратишди.

Финал якунлангандан кейин, ташкилотчилар турнирнинг энг яхшиларини тақдирлаш маросимини ўтказишди.

Энг яхши дарвозабон: Жасур Собиров (“Андижон”)
Энг яхши ҳимоячи: Жавоҳир Исломов (“Локомотив”)
Энг яхши ярим ҳимоячи: Даврон Анваров (“Бунёдкор”)
Энг яхши ҳужумчи: Шоислом Муҳитдинов (“Пахтакор”)
Энг яхши ўйинчи: Бекзод Шамсиев (“Пахтакор”)

Совриндорларни Жўра Хонназаровнинг оила аъзолари ва яқинлари тақдирлашди.