“Янгиер” биринчи лиганинг иккинчи босқичида иштирок этмайди!

Айни пайтда жамоалар мавсумнинг қолган қисмига астойдил тайёргарлик кўрмоқда. Лекин Янгиер хусусида бундай дея олмаймиз. Боиси расмий ўйинлар бошланишига оз муддат қолган бўлсада, жамоа ҳануз йиғилмади. Қолаверса бир неча йиллардан буён “Янгиер”да ишлаб келаётган бош мураббий Хайрулла Абдиев ҳам ўзига янги жамоа топишга эришди. Эндиликда самарқандлик мураббий “Чуст-Пахтакор”ни бошқарадиган бўлди. Ундан ташқари “Янгиер” билан кўплаб футболчилар хайрлашишга қарор қилган. Ижара асосида ўйнаб юрган ўйинчилар эса ўз жамоаларига қайтишган.

Шу боис охирги пайтларда ушбу жамоанинг иккинчи  босқичда иштирок эта олмаслиги тўғрисида гаплар урчий бошлади. Вазиятга ойдинлик киритиш мақсадида “Янгиер” вице-президенти Эркин Давлатов билан боғландик:  “Ҳақиқатдан ҳам, жамоанинг иккинчи босқичда ҳам иштирокини давом эттириши сўроқ остида турганди. Афсуски якунда шундай ҳам бўлиб чиқди. Ҳар қанча ҳаракат қилмайлик, бари уринишларимиз зое кетди. Албатта бунга биринчи навбатда молиявий муаммо тўсқинлик қилди. Бу борада бошқа ҳеч қандай муаммо йўқ эди. Иккинчи босқичда иштирок эта олмаслигимиз шу кунларда аниқ бўлиб улгургач, ПФЛга бу борада ёзма равишда хабар бердик", - дейди Давлатов championat.asia сайтига.

Гарчи “Янгиер”нинг мусобоқадаги иштирокини давом эттира олмаслиги аниқ бўлиб улгурган бўлсада, бугун ПФЛ сайтида бу борада расмий хабар чиқмади. Шунингдек ПФЛ расмий сайтида иккинчи босқичнинг 1-тур ўйинларига ҳакамлар гуруҳи элон қилинди. Унга кўра, “Янгиер” – “Регистон” билан рўбарў келиши ва ўйинни Тошкентлик ҳакамлар бригадаси бошқариб бориши ҳақида маълумот берилган.

Воқеалар ривожини кузатамиз.

Исломбек Рустамбеков