Ямал "Барса" сафида 2031 йилгача ўйнайди! Супер юлдузнинг янги шартномаси ҳақида (мутолаа учун)

Ламин Ямал 13 июль куни 18 ёшга тўлади, аммо у асосий совғани қўлга киритиб бўлди, бу "Барселона" билан яхшиланган шартнома ва маошининг жиддий оширилиши.

Афсонавий 10-рақам ҳам истисно этилмаган.

Ямалнинг янги шартномаси ҳақида энг муҳим жиҳатлар: муддати - 6 йил, маоши 15-20 миллион еврогача етиши мумкин, "Олтин тўп" учун бонус бор

Ламиннинг янги келишуви ҳақида нималарни биламиз:

● Шартнома 6 йилга, яъни 2031 йилгача мўлжалланган. У Ламин 24 ёшга тўлганда тугайди.

● Товон пули - миллиард евро. Худди 2026 йилгача амалда бўлган аввалги шартномадагидек.

● Diario Sport хабарига кўра, Ламиннинг янги шартномасида кўплаб бонуслар кўрсатилган: голлар ва ассистлар, совринлар ва албатта, "Олтин тўп" учун.

● Муҳим: мумкин бўлган барча қўшимча тўловлар эвазига Ямал йилига 15-20 миллион евро билан ҳозирги таркибнинг энг кўп маош олувчи футболчисига айланиши мумкин (бу El País маълумотлари).

● Ва яна бир молиявий тафсилот: келишувда ҳар йили иш ҳақини ошириш кўзда тутилган. Ўз вақтида Лео Мессида шундай бўлган.

● Вояга етмаганлар билан уч йилдан ортиқ муддатга шартнома тузиш мумкин эмаслиги сабабли, Ямаланинг янги келишуви 13 июль - 18 ёшга тўлган куни кучга киради.

● Ямал 10-рақамни олиши кутилмоқда - унинг ҳозирги эгаси Ансу Фати "Монако"га ижарага кетади. Аммо, ҳозирча "Барса" ҳам, Ламин вакиллари ҳам рақам ўзгариши эҳтимолига изоҳ бергани йўқ.

● "Барса" учун ҳам, Ямал учун ҳам шартномани таътилгача узайтириш муҳим эди - клуб ҳозирги таркибнинг асосий юлдузига эҳтимолий таклифлар ҳақида ташвишланишни истамади, футболчи учун эса хотиржам дам олиш муҳим эди.

Эндиликда ҳамма мамнун.

Музокаралар ҳақида инсайдлар динамикаси – Мендешнинг талабларидан хотиржам келишувгача

Capology маълумотларига кўра, Ямал аввалги шартнома бўйича солиқ тўлашдан олдин йилига 3,3 млн евро маош олган. Таққослаш учун, Роберт Левандовскининг йиллик маоши - 33,3 млн евро, Френки де Йонг - 19 млн (шунингдек, 6,2 млн бонуслар), Рафинья - 14,6 млн, Ансу Фати (ҳа!) - деярли 14 млн (барча рақамлар - солиқ тўлашдан олдин).

Cope журналисти Виктор Наварронинг маълум қилишича, Ямалнинг нуфузли агенти Жорже Мендеш Ламинни жамоадаги энг кўп маош олувчи футболчига айлантиришни талаб қилмоқда.

Мадридлик бўлса-да, ишончли инсайдер Рамон Алварес де Мон Радио Marca билан рақамларни баҳам кўрди: солиқ тўлашдан олдин йилига 40 миллион евро (30 миллион - иш ҳақи, 10 миллион - шартномани бажариш учун йиллик бонус). Соф ҳолда йилига 20 млн. Килиан Мбаппенинг даромадидаги улкан бонус қисмини ҳисобга олмаганда, бу Ла Лигадаги энг катта кўрсаткич. Инсайдер Николо Скира камтарроқ суммаларни ёзди: бонусларни ҳисобга олмаганда йилига 9 миллион евро ва йиллик маошнинг 18 миллионгача ўсиши. Аммо, у қайси даромад ҳақида гап кетаётгани, яъни соф даромадми ёки гросс, бунга аниқлик киритмаган.

"Барселона"да маош бўйича захира йўқ, аммо бу ўринда Ла Лиганинг янги қоидаси жуда қўл келди, у клубларга ҳатто шундай ҳолатда ҳам 24 ёшгача бўлган футболчилар билан шартномани узайтириш имконини беради. Бунинг учун футболчи клубда камида уч йил ўтказиши керак - Ламин, табиийки, мос келади. Аммо, маошнинг ошиб кетиши ўша мавсумнинг ўзида қопланиши керак. Акс ҳолда, у кейинги мавсум учун лимитдан чиқарилади.

Ямал музокаралар авжига чиққан пайтда чемпионлик кечки овқатини ўтказиб юборган ҳолда вазиятни ёндирди

COPE журналисти Виктор Наварро "Барселона" ортиқча пул тўламоқчи эмаслигини таъкидлади. Клубда Ламин муҳим роль ўйнашини тан олишди, аммо Левандовски ва Де Йонгнинг шартномалари ўтган даврдан истисно экани ва бундай хатолар бошқа бўлмаслигини таъкидлашди. Ҳозир "Барса" янги маошлар тузилмасини қурмоқда, бу мувозанатли ва барқарор.

Ламин тафсилотларни муҳокама қилиш қизғин палласида кутилмаганда жамоанинг чемпионлик кечки овқатини ўтказиб юборди. Журналистларни ҳам, "Барса" мухлисларини ҳам тинчлантиришга тўғри келди. Куни кеча Сан-Жуст-Десверн шаҳарчасидаги La Bonaigua ресторанида футболчи билан тушлик қилган агент Жорже Мендеш шундай деди: "Албатта, у шартномани узайтиради, ҳеч қандай шубҳа ва муаммолар йўқ. У бахтиёр. Яқинда узайтиради".

Спорт директори Деку дастлаб Ямалнинг янги маоши ҳақидаги саволга жавоб бермасликка ҳаракат қилди: "Ҳечқиси йўқ, у бахтли ва мамнун бўлиши керак. Биз каби. "Барса"дан яхшироқ муҳит ва яхшироқ клуб йўқ. ПСЖ Ламин билан қизиқди, аммо таклифлар бўлмади, чунки биз уларни эшитмоқчи эмасмиз".

Аммо кейин португалиялик барибир аниқроқ жавоб беришга мажбур бўлди: "Ламин ҳаммадан кўпроқ пул тўлашларини сўрамаган. У ҳеч қачон ҳеч нарса сўрамаган. Биз агентлар билан гаплашдик ва бу Ламин учун устувор вазифа эмас. Асосийси - қулай шароитлар. Албатта, унинг шартномаси ҳақиқатга мос келиши керак, аммо футболчилар буни сўрашмайди".

Президент Жоан Лапорта шундай деган эди: "Бизга Жорже Мендеш билан мулоқот қилиш осон - шартномани узайтириш деярли келишилган, фақат ратификация қилиш қолди. "Барса" футболчиларга имкониятларига қараб маош тўлайди. Клубимиз яхши пул тўлайди. Қолаверса, "Барса"да ўйнашдан яхшироқ нарса йўқ.

Энди барчаси расман - "Барса" мухлислари кейинги мавсумга бемалол тайёргарлик кўришлари мумкин.

Ёдингиздан кўтарилган бўлса: Ямалнинг катталар футболидаги ақл бовар қилмас икки йили

Асосийсини эслаймиз.

Ямал 2023 йилнинг 15 апрелида "Барселона"нинг асосий жамоаси сафида дебют қилган. Ўшандан бери у клуб сафида 106 та ўйинда майдонга тушиб, 25 та гол урди ва 34 та голли узатмани амалга оширди.

Ўтган ёзда Ламин Евро-2024да ғалаба қозонган Испания терма жамоасининг юлдузига айланди - 7 ўйинда 1+4. Ягона гол - Францияга қарши ярим финалдаги энг чиройли зарба.

Бу мавсумда Ямал тўхтаб қолмади - 13 та пас билан Ла Лиганинг энг яхши ассистентига айланди, бунга яна 9 та гол ҳам қўшилди. У Чемпионлар Лигасида ҳам жим турмади - 5+3. "Интер"га қарши ўйин эса ҳатто Зинедин Зиданни ҳам ҳайратда қолдирди: "Унинг ўйинини кўрганингизда... Мисол учун, "Интер"га қарши ярим финал, иккинчи бўлим, умримда бунақасини кўрмаганман. Кимдир ўз ишини шунчалик яхши ўрганиб олганини кўриш ақл бовар қилмайдиган нарса.

Унинг ижросидаги бундай ўйинни кўриш ажойиб эди, ҳаммамиз ундан завқланамиз".

Энди "Барселона" мухлислари яна камида олти йил завқланишда давом этишади.