Хоразмлик футболчилар ёш “чарм тўп” усталари ҳузурида

Айтиш жоизки, Шерзод Ибодуллаев раҳбарлик қилаётган ушбу даргоҳдан иқтидорли футболчилар етишиб чиқмоқда. Бугунги кунда мазкур мактаб-интернатнинг собиқ тарбияланувчиларидан  кўпчилиги  мамлакатимизнинг номдор футбол жамоалари сафида тўп суришаётир.
  


Чоршанба куни маҳорат масканида ўзига хос тадбир уюштирилди. Бир пайтлар ушбу даргоҳда таҳсил олган, айни дамда ўзбек футболи ривожига муносиб улуш қўшаётган собиқ тарбияланувчилардан бир гуруҳи - “Насаф” жамоаси ҳимоячиси Мақсуд Каримов, “Нефтчи” жамоаси ҳужумчиси Рўзимбой Аҳмедов, “Динамо” жамоаси ярим ҳимоячиси Санъат Шихов, жорий йилдан “Машъал-2”га таклиф қилинган ярим ҳимоячи Темур Машарипов, “Хоразм”лик дарвозабон Ғайрат Ўдаев, ярим ҳимоячи Илёс Хайровлар жонажон мактаб-интернатига ташриф буюришди. Фурсатдан фойдаланиб, улар ва ёш тарбияланувчилар иштирокида давра суҳбати ва футбол бўйича “мастер класс” соати ташкил этилди. Эътиборлиси, суҳбат чоғида ушбу футболчиларга берилган энг яхши савол эгалари бўлган ёшлар уларнинг дастхатлари туширилган коптоклар соҳибига айланишди.
  


Тадбирда Хоразм вилояти футбол федерацияси биринчи вице президенти Равшан Отажонов ва “Хоразм” жамоаси бош мураббийи Вали Султоновлар ҳам  қатнашиб, “авлодлар учрашуви”га юксак баҳо беришди.
  


- Бугунги тадбиримиз кутилганидан ҳам зиёда ўтди, -  дейди мактаб-интернат директори вазифасини бажарувчиси Шерзод Ибодуллаев. – Давра суҳбати давомида тарбияланувчиларимиз ўзларини қизиқтирган саволларга жавоблар олишди. “Мастер класс”  машғулоти мобайнида ҳам ёшларимиз кўп нарсани ўрганишди. Булар тадбиримизни янада файзли ва қизиқарли ўтишини  таъминлади.  Келгусида бундай учрашувларни тез-тез  ўтказишни мақсад қилиб қўйдик.
        

Икром ХУДОЙБЕРГАНОВ.