Хитой - Ўзбекистон футзал терма жамоалари ўртасидаги ўйин қандай ташкил этилди?

Ана шу мусобақага тайёргарлик кўраётган Ўзбекистон терма жамоаси аввалига Тошкентда 19 ва 20 апрель кунлари Эрон терма жамоаси билан иккита ўртоқлик ўйини ўтказди. Бугун эса терма жамоа аъзолари Хитойга учиб кетишди ва Чин юртида ўтказиладиган 6 кунлик йиғиндан сўнг Вьетнамга йўл олишади.

“Хитойнинг спорт маркетинг билан шуғулланувчи компанияларидан бири билан бир неча йиллардан буён алоқамиз бор. Ана шу компания вакиллари билан футзал терма жамоаларимиз ўртасида ўртоқлик ўйини ўтказиш ҳақида таклиф билан чиқдим. Улар бу таклифни қўллаб-қувватлашди ва Ўзбекистон футбол федерацияси бош котиби Сардор Раҳматуллаев номига шу ҳақда хат жўнатишди. Хитой вакиллари барча харажатларни ўзларига олишни айтиб, Ўзбекистон терма жамоасини у ерда йиғин ўтказишга таклиф этишди”, - дейди учрашув ташкилотчиси Улуғбек Мирзаев.

- Мен бу ҳақда Ўзбекистон футзал ассоциацияси ижрочи директори Рустам Толибжоновга айтганимда, у киши ҳам буни маъқуллади ва биргаликда шу таклифни ўрганиб чиқдик. Ушбу йиғинни ўтказиш борасидаги музокаралар икки ой давом этди. Хуллас, футзал терма жамоамиз 23-28 апрелда Хитойда йиғин ўтказади, бу орада Хитой терма жамоаси билан иккита ўртоқлик учрашуви бўлиб ўтади. Ҳар иккала ўйинни ҳам 2013 йилда Осиёнинг энг яхши футзал ҳаками деб топилган қизғизистонлик Нурдин Букуев бошқариб боради.

Терма жамоамиз делегацияси Пекинга маҳаллий вақт билан кечқурун етиб боради, ундан сўнг Пекиндан Аньхой провинциясининг Бенбу шаҳрига йўл олишади. Бенбуга бориш учун мезбонлар экспресс поездга чипта ҳозирлаб қўйишган. Хитойдаги иккита ўртоқлик ўйини ва машғулотлар айнан Бенбу шаҳрида бўлиб ўтади. 28 апрелда делегациямиз Бенбудан Шанхайга, у ердан эса Осиё чемпионати бўлиб ўтадиган Вьетнамнинг Хошимин шаҳрига учиб кетишади.

Терма жамоамизнинг Бенбудаги дастурига назар соладиган бўлсак, 24 апрелда машғулот, 25 ва 26 апрелда Хитой терма жамоаси билан иккита ўртоқлик учрашуви, 27 апрелда яна машғулот ўтказилади ва эртаси куни Хошиминга борилади.
Йиғин ўтказиш учун Хитой варианти маъқулланганининг яна бир сабаби Хитой иқлим жиҳатдан Вьетнамга жуда яқин, бундан ташқари, бу икки мамлакат ўзаро чегарадош.

Терма жамоамиз фақат Пекингача бўлган авиа чипталарга, Хитой визасини олиш учун ва Шанхайдан Хошимингача бўлган авиа чипталарга пул тўлашади. Қолган барча харажатларни Хитой вакиллари кўтаришади. Бу харажатларни Хитой футбол федерацияси эмас, балки Хитойдаги компаниялардан бири кўтаради.

- Бу қандай компания ва уларга бундан нима фойда?
- Бу футболчиларнинг трансферлари, футбол учрашувлари трансляцияси, футбол экипировкалари билан шуғулланувчи компания (Beijing sports and Culture Company New Championship), раҳбари Ян Ан.

Бу компания терма жамоамизнинг барча харажатларини ўз бўйнига олди, бундан фойда эса Хитой ва Ўзбекистон терма жамоалари ўртасидаги ўртоқлик ўйинларининг трансляциясини сотиш орқали олинади. Трансляция орқали тушган маблағ эвазига улар фойда кўришади.

Ўзбекистон футзал ассоциацияси терма жамоанинг ўртоқлик ўйини ўтказаётганидан ва ҳамма ҳаражатни кўтараётганидан ютади, Хитой футзал ассоциацияси терма жамоаси билан кучли рақиб ўртоқлик ўйини ўтказаётганидан ютади, ҳаражатларни кўтараётган компания эса трансляция ҳуқуқини сотишдан. Ўз навбатида трансляцияни сотиб олаётган Хитой телевиденияси рекламалардан даромад қилади. Кўраяпсизми, бу занжирдек бир-бирига боғлиқ, маркетинг соҳасининг яхши ривожланганини кўрсатади.


Толибжон Қосимов суҳбатлашди