Виталий Денисов бугунги машғулотларда ҳам қатнаша олмади

Кеча Азиз Ҳайдаровни сафдан чиққанлиги ва Виталий Денисовни машғулотда иштирок этмагани ҳақида ёзиб ўтган эдик. Афсуски "Локомотив" ҳимоячиси бугун ҳам машғулотларда қатнаша олмади. Ҳозирча уни Қатарга боришидан бошқа ҳеч нима маълум эмас.

Машғулотлар соат 19:20да бошланди. Одатга кўра чигал ёзди машғулотлар ўтказилгач, мураббийлар тактик машқларга навбатни беришди. Деян Журжевич Хитой сафарига ҳозирлик кўраяпти. Ўзбекистон - Сурия ўйинига Хитой ва Қатардан "айғоқчилар" келгани айтиб ўтишимиз лозим. Ҳудди биз каби, рақибларимиз ҳам терма жамоамизни зимдан ўрганяптилар.

Соат 20:00га қадар давом этган машғулотнинг сўнгги дақиқалари бурчак зарбасини тўғри амалга оширишга қаратилди. Бугунги кунда терма жамоамизнинг энг оғриқли нуқталаридан бири айнан шу бўлиб турибди. Сурия билан ўйинда Ўзбекистон терма жамоаси, бир эмас 17 (!!!)та бурчак зарбасини бажардилар. Улардан фақат биргинаси хавфли кўриниш олганди (ёдингизда бўлса Гейнрихнинг тўп узатишидан сўнг Аҳмедов тўхтатмай уни дарвоза томон йўналтирганди).

Эртага терма жамоамиз чартер рейс билан Қатар пойтахтига учиб кетадилар. У ердаги ўйин маҳаллий вақт билан соат 19:00да "Ал Садд" стадионида бошланади.

Бугун Виталий Жалиловнинг туғилган куни муносабати билан уни табриклашди.

Нодирхўжа Юлдашев.