Вадим Абрамов: "Бу ташкилотнинг ички иши, ушбу ишларни сизлар муҳокама қилиш ва ёзишларингиз керак"
15 июн 23:37
Янгиликлар

Вадим Абрамов: "Бу ташкилотнинг ички иши, ушбу ишларни сизлар муҳокама қилиш ва ёзишларингиз керак"

Суперлига 12-туридан ўрин олган "Хоразм" - "Динамо" (1:2) учрашувидан сўнг меҳмонлар бош мураббийи Вадим Абрамов матбуот анжуманида иштирок этди.

"Кутилганидек баҳс қийин кечди. "Хоразм" тажрибали мураббий ва яхши шаклланган таркибга эга. Рақиб аввалги ўйинларни сўнгги дақиқаларда бой берган эди. Устига устак "Хоразм" таркибида ўтган мавсумларда бизнинг сафимизда бўлган ёш футболчилар бор эди. "Валидол"ли ўйин бўлди. Мухлисларимизга ҳам раҳмат. Биз худди Самарқандда ўйнагандек бўлдик", - дея фикр билдирди Вадим Абрамов бугунги баҳс ҳақида.

- Иккинчи голдан сўнг Станоевич ва Майконни майдонга туширдингиз. Бундан мақсад ҳисобни ушлаб қолиш эди, аммо бундай услуб сизга хос эмас. Сизга ҳисобни сақлаб қолиш учун ҳимояланишдан кўра 3:0 ҳисобида ғалаба қозониш ёки 0:3 ҳисобида мағлуб бўлиш маъқулроқ. Нега "Динамо" бугун ўзига хос бўлмаган услубда ўйнади?

- 2:1 ҳисобида "Хоразм" жуда қулай стандарт вазиятларга эга бўлди. Шу сабабли тажрибали футболчиларни майдонга туширдим. Агар гол ўтказиб юборганимизда, ғалаба голини киритишга вақт етмаслиги мумкин эди. Сабаби шу. Ўйин шунга мажбур қилди.

- "Динамо"ни яқин икки ҳафтада тўрт учрашув кутиб турибди. Бу худди АПЛдаги "боксинг дэй" каби. Ушбу зич тақвимга қандай режа тузганмисиз?

- Кўрамиз. Ўйлайманки, биз яхши захира ўриндиғига эгамиз. Ўзингиз кўрдингиз, бугун захирадан ўйинга қўшилган футболчилар ҳам ўйинни бузиб қўйишмади. Футбол шундай ўйин. Бундай муаммолар билан барча жамоалар тўқнаш келишади.

- Қайси рақибни алоҳида таъкидлаб ўтишингиз мумкин? "Бунёдкор", "Қўқон-1912", "Нефтчи" ва "Насаф...

- Ҳа. Биринчи "Бунёдкор", кейин "Қўқон-1912", учинчи "Нефтчи" ва сўнгиси "Насаф". Барчаси тақвим бўйича.

- ПФЛ "Динамо"ни шунчалик яхши кўрадики, "Нефтчи"га қарши учрашувни, "Қўқон-1912" ва "Насаф"га қарши баҳслар ўртасига белгилаб беришди. Бундай қарорнинг сабаби нима деб ўйлайсиз? Жамоа раҳбарияти бундай қарорлар ҳақида қандай фикрда?

- Бундай вазиятларни изоҳлаш мен учун қийин. Бизга Кубокдаги ўйинни ҳам ўтказиш таклифини беришни, биз эса эртароқ ўйнашга розилик бердик. Бундай майда нарсаларга эътибор бермаймиз. Вазифамиз футбол ўйнаш. Бу ташкилотнинг ички иши, ушбу ишларни сизлар муҳокама қилиш ва ёзишларинг керак.