Ширинбой Абдуллаев: "Ўзимизнинг хатомиз туфайли мағлуб бўлдик"

- "Бухоро" жамоаси мавсумдаги дастлабки учрашувини ўтказди. Дастлабки таассуротлар қандай? "Бухоро" мағлубиятга учрашга лойиқ эдими?

- Биз мавсумга яхши тайёргарлик кўрдик. Бугунги баҳс ҳам анча яхши ўтди. Биринчи ўйин бўлгани учун икки жамоада ҳам ҳаяжон сезилди. Ўзимизнинг хатомиз туфайли мағлубиятга учрадик. Кейинги баҳсларга яхшироқ тайёргарлик кўрамиз. Бугун икки жамоа ҳам дурангга муносиб ўйин намойиш этганди. Баҳс сўнгида эса хатога йўл қўйдик ва гол ўтказиб юбордик. Ўша вазиятда фол бор эди дейишмоқда. Тез орада ушбу ҳолат бўйича якуний қарорни билиб оламиз. Дурангга лойиқ ўйин кўрсатган эдик, назаримда.

- ОКМК таркиби жиҳатидан "Бухоро"дан кучлироқ жамоа. "Бухоро"нинг кейинги рақиби эса "Қизилқум" бўлади. Бугунги мағлубият "Қизилқум"га қарши баҳсдан олдин салбий таъсир ўтказмайдими?

- ОКМК ўтган мавсумда кумуш медалларини қўлга киритганди. Биз бугун яхши қаршилик кўрсатдик, улардан ёмонроқ ўйнаганимиз йўқ. "Қизилқум" билан ўз уйимизда ўйнаймиз ва яхши тайёргарлик кўриб, ғалаба қозонишга интиламиз.