Сергей Лушан: "Чемпионни мағлуб этиш икки карра ёқимли"

"Жуда ажойиб ўйин. Агар мавсум давомида шундай ўйинлар кўп бўлса сифат ошарди. "Пахтакор"га қарши ўйин доим қийин ўтади. Чемпионни мағлуб этиш икки карра ёқимли", - дейди Лушан.

- Нима учун бугун Акром Комилов захирада қолди?

- Сабаби охирги икки ўйинда футболчи у қадар ўзига ишонмаётганди. Ўйинни четдан кузатиш унга фойдали бўлишини ўйладик. Захирадан тушиб ўзини яхши кўрсатди. Гол урганидан хурсандман.

- Дилшод Жўраевнинг ўйинидан қониқдингизми?

- Ажойиб ўйнади. Барчаси унинг ўзига боғлиқ. Шундай ўйнашда давом этса асосий таркиб футболчиси бўла олади.

- Биринчи гол ўтказилган вазият борасида нима дея оласиз?

- У вазиятда гол бўлганди. Футболчилар шундай дейишди.

- Акмал Шораҳмедовнинг ўйинида пасайиш бор. Унга рақобатчи йўқми?

- Жамоамиз ғалабали серияни давом эттирмоқда. Таркибни алмаштирмайман. Балки ёшларни алмаштирарман, аммо ҳимояда тажрибали футболчилар бўлиши керак.

Нарзулла Сайдуллаев