Сергей Арсланов: "Навбаҳор" жуда тартибли ва яхши ташкиллаштирилган ҳимоя намойиш қилди"

- Ўйин ҳақида

- Биринчи навбатда, "Навбаҳор" жамоасини навбатдаги ғалаба ва кубокда кейинги босқичга йўл олганликлари билан табриклайман. Ўйинга келсак, аламли мағлубият. Ҳаракатларимиз яхши бўлди. "Навбаҳор"дек яхши ташкил қилинган жамоага қарши ўйнаш жуда қийин бўлди. Биз мухлислар "Навбаҳор"ни қандай қўллаб туришганини жуда яхши ҳис қилдик. "Сурхон" футболчилари бунга дош бера олишди ва яхши ўйин кўрсатишди. Афсуски, натижа ижобий бўлмади.

- "Сурхон" жамоаси мухлисларга ёқадиган ўйин кўрсатмоқда. Бироқ, бугун негадир узоқдан зарбалар кўрмадик?

- Бизнинг ҳаракатларимиз ҳар доим рақиб жамоа ҳаракатларидан келиб чиққан ҳолда бўлади. Бугун ҳаммамиз кўрдикки, "Навбаҳор" жуда тартибли ва яхши ташкиллаштирилган ҳимоя намойиш қилди. Шу сабаб ҳам бизга узоқдан зарба бериш ва жарима майдонига кириш қийин бўлди. Ўтказиб юборилган голдан кейин бўш ҳудудлар пайдо бўла бошлади. Биз бундан фойдаланишга ҳаракат қилдик, аммо реализация масаласи оқсади. Баъзи вазиятларда ҳакамнинг қарори бизнинг фойдамизга бўлмади. Буни муҳокама қилмоқчи эмасман. Саволга қайтсак, рақиб бизга узоқдан зарба беришга имкон қолдирмади.

- "Сурхон" олдига ушбу мавсум қандай мақсад қўйилган?

- Кўп бериладиган савол. Жамоамиз ёшлигидан келиб чиқсак, бизда мақсад ҳар доим юқори қўйилади. Бизда совринли ўринларни эгаллаш бўйича аниқ бир мақсад қўйилмаган, аммо ҳар бир учрашувда ғалаба қозонишни мақсад қилганмиз. Бу ёшда энг муҳими шу. Йигитларимиз ёш, уларни ёрқин келажак кутиб турибди.