"Самвел Бабаян Улуғбек Мирзаевга катта футболга йўлланма берганди. Энди эса..." — "Навбаҳор" президентидан муносабат

Унда Фарҳод Мираҳматовнинг ижара шартномасидаги муаммолар, "Навбаҳор"нинг "Бунёдкор" футболчиларига бўлган қизиқиши ҳамда қарздорлиги тўғрисида гап борган. Бу суҳбат футбол ишқибозлари орасида қизғин баҳс ва муҳокамаларга сабаб бўлди. Шундан кейин Наманган клуби раҳбариятининг юқоридаги мавзулар бўйича фикри билан қизиқдик. Қуйида "Навбаҳор" президенти Отабек Саматов билан интервьюни ўқишингиз мумкин.

— Ассаломалейкум, Отабек ака. "Бунёдкор" томонининг таъкидлаши бўйича, Фарҳод Мираҳматовнинг трансферида адолатсизлик бўлган. Шу воқеани батафсилроқ тушунтириб бероласизми?

— Авваламбор ассалому алайкум! Тўғриси, Улуғбек Мирзаевнинг интервьюсини кўрганимда, очиғи, ҳайрон бўлдим. Чунки “Бунёдкор” раҳбари “Навбаҳор” клуби шаънига ножўя гапларни айтгани мени ранжитди. Мираҳматовнинг трансфери бўйича ҳеч қандай адолатсизлик бўлмаган. Барчаси ўзаро келишув асосида амалга оширилган. Ахир биз футболчимизни текинга бердик-ку, шартнома имзолашдан аввал рози бўлиб, энди оммага бу нотўғри, жентльменликмас, дейиш жентльменнинг гапими? Бир тийин пул тўламасдан футболчи олгандан кейин яна бизга қарши ўйинга қўямиз дейиш жентльменликка кирадими? Майли, бизга қарши ўйнатсин, лекин шартномада бу борада тегишли банд киритилган ва унга амал қилиш керак. Вазият шунчаликка борар экан, нега эътирозларини шартнома имзолаётганда айтишмаган? Бугунги кунда “Навбаҳор” фаолияти ҳар тарафлама ҳалоллик принципларига асосланган ва табиийки, адолатсизлик бўлишига йўл қўймаймиз. Мираҳматов трансферига келсак, давралар оралиғида унинг ижараси бўйича кўплаб жамоалардан таклифлар тушди, улар ижара эвазига яхшигина пул беришларини айтишди. Лекин Фарҳоднинг ўзи фарзанд кутаётганлигини, шу боис оиласига яқинроқ бўлиш мақсадида Тошкентда, “Бунёдкор”да тўп тепишни хоҳлаётганини айтди ва биз футболчимизнинг хоҳишини биринчи ўринга қўйган ҳолда, уни “Бунёдкор”га текинга беришни маъқул деб топдик. Мираҳматовнинг бизга қарши ўйинларда қатнашиши бўйича биз қўйган шартларни ҳам тўғри тушуниш, буни адолатсизликка йўймаслик керак. Ахир биз регламентга қарши ҳеч нима қилмадик-ку!

— Бунга қадар сиз ижарага олган футболчилар учун бошқа клублар ҳам шундай шарт қўйганмиди? Яъни ўзаро ўйинларда ўйнатиш тақиқини. 

— “Навбаҳор” шу пайтгача бир неча марта айрим жамоалардан футболчиларни ижарага олган бўлса, кўпинча шундай талабларга тўқнаш келган, лекин ҳеч қачон буни адолатсизлик деб ҳисобламаган, футболчининг трансфер ҳуқуқига эга бўлган томон талабларини ҳурмат қилган. Шундай экан, нега энди вазият тақозо этган пайтда жамоамиз ўз шартларини ўртага ташламаслиги керак? Боз устига, бу шартлар шартнома бандларида келтириб ўтилган бўлса.

Аввалроқ Улуғбек Мирзаев менга қўнғироқ қилганда, ушбу масала юзасидан бафуржа гаплашиб олгандик. Суҳбат пайти ўзига қўйса, Фарҳод Мираҳматовни олишни хоҳламагани, фақат мураббийлар хоҳлагани учун шу футболчини олишга мажбур бўлганини айтганди. Энди эса айнан шу футболчини бизга қарши ўйната олмаганидан жаҳли чиқаётганини қандай тушуниш мумкин? Умуман, клуб раҳбари бошқалар шаънига ножўя сўзлар айтгандан кўра, футболчилар ва мураббийларга қулай шароит яратиб беришга кўпроқ эътибор қаратса яхши бўларди. Жамоа ғалаба қозонганда, футболчилар ва мураббийларни шунга яраша ҳар томонлама рағбатлантириш керак эмасми?

Демак, бу ҳолатда шундай тасаввур уйғоняптики, гўё Улуғбек Мирзаевни 35 млн.нинг тўланмагани ёки Мираҳматовни "Навбаҳор"га қарши ўйната олмаётгани эмас, балки ҳозир айрим етакчи футболчилари билан шартномани янгилай олмаётгани кўпроқ аламзада қилган кўринади. Бунинг таъсирида эса бошқа нарсаларни мисол қилиб, бизни айбдор қилиб кўрсатмоқчига ўхшайди. Футболчиларнинг жамоа билан шартнома имзолашни истамаётгани, раҳбарга ишончи йўқлигини билдиради.

— Улуғбек Мирзаев бу ишни Бабаяннинг услуби деб атади. Ростан ҳам бу фикр Самвел Вячеславовичдан чиққанмиди?

— Самвел Вячеславович қаерда ишламасин, ҳамиша жамоаси билан максимал натижаларга эришишга уринади ва буни амалда уддалайди ҳам. Унинг “Пахтакор” ва “Локомотив”да эришган ютуқлари бунга яққол мисол бўлиши мумкин. У бугун “Навбаҳор”да ҳам ижобий ўзгаришларни амалга ошириш учун астойдил интилмоқда. Муайян футболчилар, умуман, жамоага боғлиқ масалалар эса раҳбарият ва мураббийлар штабининг ўзаро келишувига асосан амалга оширилди. Демак, Мираҳматовнинг ҳолати бўйича вазиятда барчасини Бабаян услубига йўйиш нотўғри бўлади. “Навбаҳор” профессионал клуб, бизда барчаси биргина инсоннинг гапига қараб амалга оширилмайди. Барча ишни масъуллар иштирокида бамаслаҳат ҳал қиламиз.

Бу ўринда “Бунёдкор” раҳбари барчасида Бабаянни айбдор қилиб кўрсатаётгани ҳам ғалати. Самвел Вячеславович Улуғбек Мирзаев билан ушбу масала юзасидан суҳбатлашганда, ўзини босиб олиши кераклигини, арзимаган нарсалар сабаб ҳамкасблари билан жанжаллашмасликни маслаҳат бериб, ҳақиқий Устозлигини кўрсатиб қўйди. Ахир у “Андижон”да ишлаётган пайт айнан Бабаян уни “Пахтакор” матбуот котиблигига таклиф қилиб, бошқа кўплаб мураббийлар, футболчилар ва медиа вакиллари сингари унга ҳам катта футболга йўлланма берганди. Шу эмасми аслида ҳақиқий жентльменлик? Бизда “Устоз отангдек улуғ” деб бежиз айтилмаган, Устозларга ҳурмат бизнинг вужудимизга она сути билан киради, ахир ота-оналаримиз Устозларга эҳтиёткорлик ва ҳурмат билан муносабатда бўлишни ўргатишади-ку!

— Бабаян "Навбаҳор"да маслаҳатчи мураббий сифатида иш бошлагани айтилди. Биламизки, у жуда ҳам яхши ташкилотчи ва менежер ҳисобланади. У жамоанинг трансферларида ҳам иштирок этадими?

— Юқорида айтганимдек, бизда ҳамма иш раҳбарият ва мураббийлар штабидагилар ўзаро маслаҳатлашганидан сўнг амалга оширилади. Самвел Вячеславовичнинг ҳам шу штабдан ўрин олганини инобатга олсак, унинг ҳам трансферлар жараёнида иштирок этиши табиий ҳол.

— Улуғбек Мирзаев "Навбаҳор" раҳбариятининг ҳаракатлари жентльменликка зидлиги айтди. Бунга муносабатингиз қандай?

— Даставвал Улуғбек Мирзаевнинг интервью пайти “Навбаҳор”да бошқа жамоаларга нисбатан салбий муносабат шаклланиб қолган” деганига эътибор берсак. Бу жиддий айблов. Умуман, қайсидир клуб раҳбарининг бошқа жамоаларнинг ҳам номидан гапириши жуда ғалати эмасми? Тўғри тушунишимиз керак, муайян бир жамоа билан келишув пайти қайсидир футболчини бизга қарши майдонга тушириш масаласида шарт қўйишимиз уларни ҳурмат қилмаслигимизни англатмайди, буни жентльменликка зид дейиш нотўғри. Клубимиз барча жамоаларни, улар билан ҳамкорликни юксак қадрлайди. Футболда эса тез-тез музокаралар ўтказилади ва улар ҳар доим ҳам қайсидир томон хоҳлагандек якунланавермайди. Умуман, “Навбаҳор”да фаолият бошлаганимдан бери кўплаб клуб раҳбарлари билан дўстона алоқаларни йўлга қўйдик, зарур ёрдам керак бўлган паллада, қайсидир масалаларда уларга бажонидил кўмаклашдик ва эвазига раҳматларни эшитдик. Гап айнан қайси жамоалар ҳақида бораётганига тўхталмайман, акс ҳолда, айримлар буни ҳам нотўғри талқин қилишлари мумкин.

Эътибор беринг, биз текинга футболчи беряпмизда, бунинг эвазига раҳмат ўрнига ҳақорат эшитяпмиз. Улуғбек Мирзаев ўз жамоасида футболчимизни текинга ўйнатмоқда, лекин бунинг учун миннатдорчилик билдириш ўрнига... Бу ерда ким жентльменликка зид иш қиляпти? Унинг шу ҳаракатлари жентльменлик дейиладими? Футболчимизни текинга бергандан кейин унинг жамоамизга қарши ўйинларда майдонга тушиши бўйича шарт қўйишга ҳаққимиз бор. Улуғбек Мирзаев аввал ўзи жентльменларга хос иш қилиб, кейин буни бошқалардан талаб қилса, яхшироқ бўларди. Айтдим-ку, Мираҳматовнинг ижараси учун пул беришга тайёр жамоалар бор эди, лекин биз уни “Бунёдкор”га текинга бердик. Хўш, ким бу ерда жентльмен?

Бир пайтлари “Пахтакор”дан Шоҳруҳ Маҳмудҳожиевни ижарага олганмиз, ТЕКИНга эмас, унинг ижараси учун яхшигина пул тўлаганмиз. Шунда ҳам уларга қарши ўйинларда бу футболчини майдонга туширмаслигимизни шарт қилиб қўйишганди. Бошқа жамоалардан ижарага футболчи олганимизда ҳам шундай шартлар кўп бўлган. Биз бунга футболдаги оддий ҳолат сифатида қараганмиз, талабни тўғри қабул қилганмиз, уларга жентльменликдан дарс беришга ҳаракат қилмагандик.

Умуман, футболда Корпоратив Бирдамлик, фикрдошлик деган нарса бор, биз ҳамкасблар билан кундалик иш жараёнимизга тааллуқли турли мавзуларда тез-тез фикр алмашамиз, қайсидир жиҳатлар бўйича тажриба алмашамиз, қаердадир баҳслашамиз, лекин ҳеч бир ҳамкасбимиз икки раҳбар ўртасидаги гап-сўзларни, гарчи у баҳсли масалада бўлса ҳам, бу гапларнинг матбуотда чоп этилишига сабабчи бўлганини ҳеч қачон кўрмаганман. Бу кўпроқ ўзини пиар қилишга ўхшамоқда, Корпоратив Этика ва Бирдамликни эса менсимаслик кўзга ташланмоқда. Ахир бу жентльменликми?

— Миржаҳон Мираҳмадов ва Нурилло Тўхтасиновга клубни огоҳлантирмай, таклиф билан чиққанингиз ростми?

— Ушбу футболчиларнинг шартномалари якунланишига 6 ой муддат қолганидан хабар топгач, улар билан, аниқроғи, агентлари билан музокарага киришмоқчи бўлдик. Футболчилар билан шу масалада алоқага чиққанимизда, клуб раҳбариятига мурожаат этишимиз кераклигини айтишди. Тегишли тартибда “Бунёдкор”га Мираҳмадов ва Тўтасиновнинг трансфери бўйича расмий хат жўнатдик. Умуман олганда, Нурилло Тўхтасиновга ўтган йили ҳам қизиқиш билдиргандик, уни сотиб олиш масаласида “Бунёдкор”га хат жўнатгандик. Бу сафар ҳам барчасини белгиланган тартиб асосида амалга оширишга ҳаракат қилдик, регламент, профессионаллик ёки жентльменликка зид бирор иш қилмадик.

— Мираҳмадовнинг трансфери "Навбаҳор" "Бунёдкор" олдидаги қарзини узмай келаётгани туфайли амалга ошмабди. Клуб қай тариқа Тошкент клубидан қарздор бўлиб қолган?

— Ушбу қарздорликнинг вужудга келишига сабабчи бўлганлар бугун клубда ишлашмаяпти. Афсуски, ўз вақтида, тизимнинг нотўғри йўлга қўйилиши оқибатида мана шундай қарзларнинг вужудга келгани ачинарли ҳол. Гап шундаки, ўшанда “Бунёдкор”дан 3 нафар футболчи ярим мавсумга ижарага олинган. Энг қизиғи, бу футболчилар жамоанинг ўша пайтдаги ёшлар (ўринбосарлар, дублёр) жамоасига олинган. Тасаввур қилинг, ёшлар жамоасига 35 млн.га бошқа жамоадан футболчи олиб келиб ўйнатмоқчи бўлишган. Кўриниб турибдики, кимлардир шу тариқа молиявий манфаатни, осон йўл билан даромад орттиришни кўзлаганга ўхшайди, акс ҳолда, ўзимизда шунча ёшлар бўлатуриб, бошқа ердан ўйинчи олиб келинишини яна қандай тушуниш мумкин? Ушбу масала ҳамон ўрганиб чиқилмоқда, “Бунёдкор”дан йил охиригача мухлат сўраганимизнинг сабаби ҳам шу.

— Қарз масаласида. "Пахтакор" Азиз Турғунбоевнинг трансфери бўйича тўловларни амалга оширдими?

— “Пахтакор” биз билан тўлиқ ҳисоб-китоб қилган, шундай экан, бу клубнинг биздан қарздор эканлиги ҳақидаги гаплар ҳам миш-мишдан бошқа нарса эмас.

— Биламиз, "Навбаҳор" амбициялари жуда катта клуб. Раҳбарият таркибни кучайтиришга ҳаракат қиляпти. Қишки трансфер ойнасида шов-шувли трансфер кўрамизми? Сир бўлмаса, клуб қайси футболчиларни кўз остига олиб қўйган?

— Тўғри, “Навбаҳор” ҳар доим ўз олдига юқори мақсадларни қўяди. Катта натижаларга эришиш эса таркибни кучайтириш заруратини вужудга келтиради. Умуман олганда, ҳозир қишки трансферлар ҳақида гапиришга эрта, зеро иккинчи давранинг кўп ўйинлари ҳали олдинда. Шунга қарамай, айтишим мумкинки, кўз остимизга олиб қўйган футболчилар бор, улар билан музокаралар давом этмоқда. Гап айнан қайси футболчилар ҳақида бораётганини ҳозир айтмаганим маъқул, яна ортиқча гап-сўзлар кўпаймасин. Вақти келиб, бу борада албатта маълумот берилади.

Бундан ташқари, шуни мамнуният билан таъкидламоқчиманки, жорий мавсум “Навбаҳор”нинг фарм, U-21, U-18 жамоаларида жуда кўплаб футболчилар ўзларини яхши томондан кўрсатишмоқда, мураббийларимиз уларни мунтазам кузатиб боришмоқда. Ушбу футболчиларнинг аксариятини кейинги йилдан асосий таркибда кўришимиз мумкин, ҳозирда уларнинг кўпчилиги асосий жамоа машғулотларида қатнашишмоқда, катта ёшли футболчилар ва малакали мураббийлардан ўзларига керакли бўлган тажрибани ўрганишмоқда. Бир сўз билан айтганда, уларнинг асосий жамоадаги адаптация жараёни яхши ўтиши учун барча шарт-шароитлар яратиб берилмоқда. Ҳали бу футболчилар асосий таркибга ўтишганидан кейин четдан ўйинчи олиб келишга эҳтиёж қолмайди, “Навбаҳор” асосини ҳам клуб тарбияланувчилари ташкил этади.

— Суҳбат охирида қўшимча фикрларингиз бўлса, бемалол...

— Юқорида таъкидлаганимдек, “Навбаҳор” ўзбек футболига дахлдор ҳар бир ташкилот, клуб вакиллари ва мутасаддиларни ҳурмат қилади, улар билан ўрнатилган ҳамкорликни қадрлайди. Албатта, биз жамоамиз манфаатларини, “Навбаҳор”нинг жонкуяр мухлислари манфаатини биринчи ўринга қўямиз. Мавжуд масалаларни ЎФА ҳамда ПФЛ томонидан белгиланган тартиб-қоидаларга мувофиқ тарзда амалга оширишга интиламиз ва буни амалда уддалаяпмиз. Шундай экан, футбол жамоатчилигидан “Навбаҳор” ҳақида кимдир турли ножўя фикрларни билдирганда, вазиятни яхшилаб ўрганиб, кейин хулоса чиқаришларини сўраб қоламан. Клубимизда ҳамма иш профессионал тарзда йўлга қўйилган ва бу борада бизга нисбатан нотўғри айблов билдиришга ҳеч кимнинг ҳаққи йўқ.

Биз жамоамизда меҳнат қилаётган мураббийлар ва таркибдаги футболчиларга ишонамиз. Барчамиз жамоанинг ғалабаларга эришиши учун астойдил меҳнат қиляпмиз. Бу саъй-ҳаракатлар вақти келиб самара беришига ишончим комил. Қолаверса, бизни ҳар доим қўллаб-қувватлаб турадиган фидойи мухлисларимиз бор, фурсатдан фойдаланиб, уларга сиҳат-саломатлик ва оилавий тотувлик тилайман. “Навбаҳор”га ишқибозлик қилишдан асло чарчашмасин.

"Навбаҳор" раҳбарияти жентльменлик қилмади" — Улуғбек Мирзаев