Равшан Эрматов: "Агар футболчилар ойлиги камайишига рози бўлса, бундан хурсанд бўлардим"

Карантин сабаб аксар йирик корхоналар ўз фаолиятини вақтинча тўхтатиб турибди. Кўп клублар вилоят ҳокимликларига тегишли эканини инобатга олиб бу ҳолат футболимизга таъсир кўрсатиши мумкинми? Барибир ҳозир асосий маблағ коронавирусга қарши кураш учун сарфланяпти. 

- Бу жуда ўринли савол. Ҳозир бутун дунёда кўп соҳаларнинг кун тартибида турган савол. Бу борада иқтисодиётчилар турли тахмин ва фаразларни илгари суришяпти. Келажакда нима бўлишини ва карантин қачон тугашини ҳеч биримиз аниқ айта олмаймиз. 

- Лекин мана шундай қийин ва синовли кунларда фидойилик биринчи ўринга чиқиши керак. Футболга бўлган меҳр ва муносабат юқори планга чиқиши лозим. Футболни кўпроқ яхши кўрамизми ёки пулними? Мана шу саволга ҳамма ўзи учун жавоб берса яхши бўларди.

- Кўпинча мураббийлар айтади: биз ёшликда кўпроқ футболни яхши кўрардик, аммо ҳозирги авлодда бунинг тескариси деб. Албатта, коронавирус балоси ҳар қандай давлат иқтисодиётига таъсир қилиши аниқ. Шундай экан вазиятдан чиқиб кетиш йўлларини қидиришга тўғри келади. 

- Агар бизда ҳам ойликнинг маълум бир қисмини ушлаб қолишга тўғри келса, ўйлайманки бунга кўпчилик футболчилар рози бўлади. Европага назар ташланг, жуда кўп жойларда ойликларни камайтириш устида иш олиб бориляпти. Ҳатто кўпчилик футболчилар ўзлари ташаббус билан чиқишяпти. 

- Агар бизда футболчилар ойлиги камайишига рози бўлса, бундан шахсан мен хурсанд бўлардим. Лекин буни ҳамма тўғри тушунган ҳолда қабул қилиш лозим, бу нарса пиар ёки кимгадир мақтаниш учун қилинмайди. Савоб учун қилса бўлади, - дейди Равшан Сайфиддинович.