"Пахтакор" яна битта ютса, биринчи даврадаги натижасини такрорлайди

Охирги учта ўйинни 1:0 ҳисобидаги ғалаба билан якунлаган "Пахтакор" шу баҳсларда "Бунёдкор", "Насаф" ва "Машъал"ни мағлуб этди. Умумий ҳисобда бу жамоанинг қаторасига ғалабалар сони 5та бўлди. Питер Хюистра шогирдлари бунгача "Локомотив" билан "Сурхон"дан ҳам устун келишганди. 

Агар "Пахтакор" кейинги турда ҳам зафар қучса, кетма-кет ғалабасини 6тага етказиб биринчи даврадаги натижасини такрорлайди. Чунки амалдаги чемпион бу йилнинг мавсумнинг дастлабки 6та ўйинини ўз фойдасига ҳал этиб, фақат 7-турда "Турон" билан 1:1 ўйнаганди. "Пахтакор" Суперлига 16-тур учрашувини 26 август куни ўз майдонида АГМКга қарши ўтказади. АГМК иккинчи ўринда бораётганини ҳисобга олсак, Тошкентда қизиқарли тўқнашув гувоҳи бўлишимиз мумкин. 

Ҳозирча Суперлигада "Пахтакор" 15 ўйиндан 13тасида ғалаба қозониб, икки бор дуранг ўйнади ва ҳали мағлуб бўлгани йўқ. Тўплар нисбати 28-6. "Пахтакор" Суперлига иштирокчилари орасида энг кўп гол урган ва энг кам гол ўтказган жамоа бўлиб турибди.