Ўзбекистон Суперкубоги. Миржалол Қосимов: "Локомотив"дан қўрқмаймиз"

Тадбир икки қисмдан иборат: Биринчисида Суперкубок иштирокчилари (мураббий ва футболчилар) мухлислар ва журналистлар саволларига жавоб қайтаришади. Кейинги қисмда эса мухлислар ўз суюкли футболчиларидан эсдалик учун дасхат олиш имкониятига эга бўлишади.
Дастлаб АГМК жамоаси аъзолари тадбир қатнашчисига айланишди.

Миржалол Қосимов: "Эртага бизни жуда қизиқарли учрашув кутмоқда. Фурсатдан фойдаланиб барчани эртанги Суперкубок баҳсига таклиф этамиз. Чунки айнан мухлислар тўла стадионда ўйнаш футболчиларга ҳам ўзгача руҳ ва кайфият улашади".

- Жамоа яқинда ОЧЛ доирасида "Ал Насср"дан йирик мағлубиятга учради. Шундан келиб чиқадиган бўлсак, эртанги ўйин олдидан жамоанинг руҳий ва жисмоний ҳолати қай даражада?
- Футболда ғалаба ва мағлубият ёнма-ён ва шуниси билан ҳам футбол қизиқарли спорт тури ҳисобланади. Мен футболчиларга ишонаман, эртага улар бир жамоа сифатида бирлашиб, мухлисларимиз учун керакли натижага эришамиз деган умиддаман.

- "Локомотив" жамоасининг қайси чизиғи сизни кўпроқ чўчитмоқда?
- Чўчийдиган жойим йўқ. "Локомотив" кучли ва ҳурматга лойиқ жамоа. Эртага осон ўйин бўлмайди. Лекин мен ўз жамоамга ишонаман.

- АГМК Суперкубокка қадар иккита расмий баҳсда майдонга тушди ва маълум ўйин амалиётига эга бўлди. "Локо"да эса ўйин амалиёти йўқ. Бу жиҳат жамоага қандайдир устунлик берадими?
- Қайсидир маънода устунлик бериши мумкин. Лекин биз ҳам узоқ парвоздан келдик. Шунингдек, Суперкубок бир ўйиндан иборат баҳс. Бундай учрашувларда исталган натижа қайд этилиши мумкин. "Локомотив" кучли ва таркибида маҳоратли футболчиларга эга жамоа. Уларга бу нарса катта таъсир қилади деб ўйламайман.

- АГМК кубокдаги бир ўйинлик баҳсларда "Бунёдкор", "Пахтакор" ва "Истиқлол"ни мағлуб этди. "Ал Насср"дан эса мағлубият қабул қилинди. Эртанги баҳсда таркиб ва ўйин услубини танлашда мазкур ўйинлар ҳам сизга хулоса чиқаришда ёрдам берадими?
- Мен қўл ҳозирги қўл остимдаги футболчилар хизматидан фойдаланаман.

Акмал Шораҳмедов: "Локомотив" жамоаси кучли рақиб. Буни англаган ҳолда ўйинга жиддий тараддуд кўрдик. Муҳими, эртага стадион мухлислар билан тўлиб турса ўйнаш янада ёқимли бўлади."

Жасур Ҳасанов: "ОЧЛдаги мағлубиятни эсдан чиқарган ҳолда эртанги баҳсда ғалаба учун майдонга тушамиз".

Акбар Тўраев: "Эртанги баҳсда фақат ва фақат ғалабани ўйлаяпмиз ва мўжазгина соврин билан мухлисларимизни хурсанд этмоқчимиз".

Бобур Юлдошев: "Локомотив"да кўп ўйнаганман ва собиқ жамоамга қарши баҳслашиш қизиқ бўлади. Ўтган мавсумда ҳам "Нефтчи" таркибида "Локо"га қарши ўйнагандим. Эртага мен Суперкубокка эга чиқмоқчиман. АГМК ҳозир фақат ғалабани ўйламоқда".

Зоҳир Пиримов: "Ўтган йили жамоа ўз тарихида янги саҳифа очганди. Эртага ҳам клуб музейини яна бир соврин билан тўлдириб қўйиш истагида ёнмоқдамиз".