Ўзбекистон ўсмирлар терма жамоаси 9-бор Осиё чемпионатида ўйнайди

Жамоамиз Фаластинда ўтган саралаш баҳсларида Мальдив (8:0), Фаластин (6:0) ва Яман (5:2) ўсмирларини мағлуб этиб қитъа биринчилигига чиқди.

Шу тариқа, Ўзбекистон ўсмирлар терма жамоаси ўз тарихида тўққизинчи бор U-16 Осиё чемпионатида иштирок этади. Ўсмирларимиз кетма-кет бешинчи бор бу чемпионатга йўл олмоқда.

Бунга қадар U-16 жамоамиз 1994, 1996, 2002, 2004, 2008, 2010, 2012 ва 2014 йилги қитъа чемпионатида қатнашган. Маълумот учун, 2002 йил қитъада тўртинчи, 2010 йил иккинчи бўлганмиз. 2012 йил эса Эронда Осиё чемпиони бўлгандик.

Эслатиб ўтамиз, U-16 Осиё чемпионати 2016 йил сентябрь ойининг иккинчи ярмида Ҳиндистонда бўлиб ўтади.

Қуйида кейинги йил Осиё чемпионатида иштирок этадиган жамоалар нечинчи марта қитъа биринчилигига чиққани ҳақида маълумот келтирилган:

Япония - 13
Жанубий Корея - 12
КХДР - 10
Саудия Арабистони - 10
Эрон - 10
Таиланд - 10
Ироқ - 9
Уммон - 9
Ўзбекистон - 9
Ҳиндистон - 7
БАА - 7
Вьетнам - 7
Қувайт - 6
Австралия - 5
Малайзия - 5
Непал - 4