Ўзбекистон кубоги финаллари тарихидан. "Пахтакор" Сколари ва Ривалдоси бор "Бунёдкор"ни қандай мағлуб этганди?

Мамлакат кубоги финалида "Пахтакор" ва "Бунёдкор" клублари тўқнаш келишган. Ушбу тўқнашув 2007 йилда бошланган бўлиб, дастлабки финалда ("Лой жанги") "Пахтакор" пенальтилар сериясида ғолиб бўлган, 2008 йилда эса Анвар Солиевнинг қўшимча таймларда урган голлари эвазига "Бунёдкор" кубок соҳиби бўлган. Учинчи тўқнашув ҳам олдингиларидан асло қолишмаган эди.

Август ойининг саккизинчи санасида "Пахтакор" стадиони мухлислар билан деярли тўлганди. Иккала жамоа мухлислари илк дақиқаларданоқ шиддатли ҳужумлар гувоҳига айланишган. Иккала жамоа ҳам гол уриш учун илк сониялардан олдинга ўтишган. 

10-дақиқада Александр Гейнрих Игнатий Нестеров билан бирга-бир вазиятга чиқиб кетаётганида Хайрулла Каримов билан тўқнашади. Бош ҳакам Марат Исмоилов ушбу вазиятда Каримовга тўғридан-тўғри қизил карточка кўрсатади ва "қалдирғочлар" учрашувнинг 10-дақиқасиданоқ 10 киши бўлиб қолишади. "Бунёдкор" устози Луиз Фелипе Сколари ҳужумчи Хосе Луис Вильянуэва ўрнига ҳимоячини туширишга мажбур бўлади.

35-дақиқада баҳс тақдирини ҳал қилган гол урилади. Мурод Холмуҳаммедов аутдан тўпни тўғри жарима майдонига отиб беради, ҳимоячилар қайтарган тўп бўш турган Станислав Андреевга боради, у дарвозанинг узоқ бурчагини аниқ нишонга олади - 1:0.

Иккинчи таймда Ривалдо бошчилигидаги "Бунёдкор" ҳар қанча уринмасин гол ура олмаган ва кубок "Пахтакор"га насиб қилган. "Шерлар" бир йил олдинги мағлубият аламини шундай олишганди.

Ғулом Ўрунов бу финални қуйидагича ёдга олади: "Жуда оғир ва қийин беллашув ўтказганмиз. Ривалдо 36 ёш бўлишига қарамасдан унга қарши ўйнаш қийинчилик туғдирган. Мураббий мени унга персонал ўйинчи сифатида қўйганди. Уни ёнидан жилмаслигим талаб қилинарди. Чунки, у битта пас билан жамоадошларини олдинга бошларди ва ҳужумни ташкил қиларди. Мен шу пасларга тўсқинлик қилишим ва зарарсизлантиришим керак бўлган"

«ПАХТАКОР» - «БУНЁДКОР» - 1:0 (1:0)
08.08.2009. Тошкент. «Пахтакор» Марказий стадиони. 27 543 томошабин

Ҳакамлар: Марат Исмоилов-8,5; Алексей Миронов-9,0; Маъмур Саидқосимов-9,0; Бахтиёр Тоғаев-8,0
Назоратчи: Раҳим Мўминов

Гол: Станислав Андреев (35).

«ПАХТАКОР»: Темур Жўраев (Эркин Жабборов 78), Илҳом Суюнов, Анзур Исмоилов, Боян Миладинович, Мурод Холмуҳаммедов, Дарко Маркович, Акмал Холматов, Одил Аҳмедов, Станислав Андреев (Ильдар Магдеев 68), Ғулом Ўрунов, Александр Гейнрих (Фарход Тожиев 83)

«БУНЁДКОР»: Игнатий Нестеров, Саҳоб Жўраев (Виктор Карпенко 73), Хайрулла Каримов, Анвар Ғофуров, Азиз Ҳайдаров, Жоао Виктор, Жасур Ҳасанов, Сервер Жепаров (Анвар Солиев 46), Эдсон Рамос, Ривалдо, Хосе Луис Вильянуэва (Руслан Мелзиддинов 16)

Огоҳлантиришлар: Сервер Жепаров 20, Одил Аҳмедов 35, Илҳом Cуюнов 45, Жасур Ҳасанов 85, Анвар Ғофуров 87, Руслан Мельзиддинов 87, Эркин Жабборов 88, Эдсон Рамос (учрашув якунлангач).

Четлатишлар: Хайрулла Каримов 10, Илҳом Суюнов 87 (2СК)

ВИДЕО