“Ордабаси” мухлислари шаҳар маъмуриятига бойкот эълон қилишди

Қозоғистон кубоги доирасида Чимкентда бўлиб ўтган “Ордабаси” – “Актобе” ўйинида жанжал келиб чиқди.

Ўйин давомида “Ордабаси” мухлислари бойкот эълон қилиб, стадионни тарк этишди. Чунки клуб президенти Бауржан Абдубаитов яқинда истеъфога чиққанди. Мухлислар клуб тарихидаги энг титулли раҳбарнинг кетишига қарши. Уларнинг фикрича, Бауржон Тўйшибеқули ўз ихтиёри билан лавозимини тарк этмаган.

Стадионда Чимкент ҳокими ўринбосари Сарсен Куранбекнинг номини айтиб бақирганлар кўп эди. С.Қуранбек “Ордабаси” футбол клуби директорлар кенгаши раиси ҳисобланади.

Танаффус вақтида мухлислар қаршисига Бауржан Абдубаитовнинг ўзи чиқди. У мухлислардан хотиржам бўлишни сўради.

Аввалроқ “Ордабаси” клуби президенти истеъфога чиққани ҳақида хабар берилганди. Клуб расмий баёнотида у соғлиғи сабабли ўз лавозимини бўшатгани айтилган.

Абдубаитов Чимкент жамоаси раҳбариятига 2022 йилнинг бошида келганди. Икки йил ичида у клуб билан Қозоғистон кубоги ва Қозоғистон чемпионатида ғолиб чиқди. Ҳозирда клуб сафида икки нафар ўзбекистонлик футболчи тўп тепади.