"Олмалиқ": Навбатдаги йиғин бошланди, бугун "Металлург" билан ўйин

Ўзбекистон меҳмонхонасида истиқомат қилаётган жамоа, машғулотларни одатдагидек Чилонзордаги сунъий қопламали майдонда олиб бормоқда. 15-27 январь кунлари ўтказилган йиғиндан сўнг жамоа сафини бир қатор футболчилар тарк этишди. Элбек Очилов, Акмал Бозоров, Сайдулла Раҳматов ва Нурлибек Таласбаевлар кўрикда бўлиб туришганди. Шунингдек, молдовалик футболчи Адриан Кашкавал ҳам ўз юртига жўнаб кетди. Унинг жамоамиз сафига қўшилиши ёки қўшилмаслиги яқин кунларда ҳал бўлади.

Куннинг иккинчи ярмида ўтган машғулотларда қуйидаги футболчилар иштирок этишди: дарвозабонлар Умид Хонимқулов, Акмал Ортиқов, Никита Шквирин, Тимур Ғаниев, Шохруҳ Эшбўтаев, ҳимоячилар Абдуқаҳҳор Ҳожиакбаров, Сарвар Жўраев, Азамат Исроилов, Ислом Иномов, Саламат Қуттибоев, Абдумалик Тошпўлатов, Евгений Гоголь, ярим ҳимоячилар Санъат Шихов, Ғулом Ўрунов, Суннатилла Мамадалиев, Азамат Бобожонов, Муҳаммад Исаев, Никита Павленко, Зоҳир Пиримов, ҳужумчилар Ислом Исоқжонов, Маъруф Тиллаев, Дониёр Исмоилов, Неманья Йованович.

Диёр Туропов ва Жаҳонгир Абдумўминов Ўзбекистон ёшлар терма жамоаси (U-22)га чақирилган. Улар терма жамоа таркиби билан Таиландга жўнаб кетишди.


Бугун "Олмалиқ" Бекободнинг "Металлург" жамоаси билан назорат ўйини ўтказади.

Ўйин соат 15:00да Чилонзордаги сунъий қопламали майдонда бўлиб ўтади.