Нуралиев ва Мусаев Ўзбекистонда хизмат кўрсатган спорт устози
23 авг 2013 18:01
Янгиликлар

Нуралиев ва Мусаев Ўзбекистонда хизмат кўрсатган спорт устози

Ўзбекистон Республикаси Президенти Ислом Каримов 2013 йил 23 август куни Ўзбекистон Республикаси мустақиллигининг йигирма икки йиллиги муносабати билан фан, таълим, соғлиқни сақлаш, адабиёт, маданият, санъат, маънавият ва маърифат, оммавий ахборот воситалари ҳамда ижтимоий соҳалар ходимларидан бир гуруҳини мукофотлаш тўғрисидаги Фармонга имзо чекди.

Ватанимиз мустақиллигини мустаҳкамлаш, миллий ғояни ривожлантириш, маънавиятимизни тиклаш, ўзлигимизни англаш йўлида катта ҳисса қўшган, ёрқин истеъдоди ва ижоди, илмий фаолияти, ҳалол хизмати, ёшларни она-юртга муҳаббат, истиқлол ғояларига садоқат руҳида соғлом ва баркамол этиб тарбиялаш ҳамда жамоат ишларидаги фаол иштироки учун бир қатор юртдошларимиз фахрий унвонлар ва орденлар билан тақдирланишди. Улар орасида футбол соҳасига ҳисса қўшиб келаётган мутахассисларимиз ҳам бор:

Ўзбекистон Республикасида хизмат кўрсатган спорт устози унвонига футбол бўйича Ўзбекистон ёшлар терма жамоаси бош мураббийи Мусаев Аҳмаджон Расулевич ва футбол бўйича Ўзбекистон ўсмирлар терма жамоаси бош мураббийи Нуралиев Дилшод Жўраевич сазовор бўлишди.

"Дўстлик" ордени билан футбол бўйича Ўзбекистон ёшлар терма жамоаси катта мураббийи Евстафеев Алексей Владимирович ва футбол бўйича Ўзбекистон ёшлар терма жамоаси техник директори Рустам Акрамов тақдирландилар.

Биз сайтимиз мухлислари ва ходимлари номидан юқорида номлари келтирилган мутахассисларни юксак мукофотлар билан табриклаб қоламиз!

Ҳавола :

Манба : championat.asia

Янгиликларни Телеграмда ўқинг!

Рейтинг: