"Нурафшон" "Ғиждувон"ни қай тарзда мағлуб этди? (+Статистика)

Учрашув тенг курашлар остида бошланди. Аввалига икки томон ҳам бир-бирини ўрганди. Биринчи даврада ушбу рақибига мағлуб бўлган "Нурафшон" эса ғалабага чанқоқроқ эди. Улар буни 18-дақиқадаёқ исботлашди. Ўнг қанотдан Муҳаммадодил Қаҳрамоновнинг тўп узатишидан кейин Фарруҳ Шотурсунов ҳисобни очди. 

Шундан кейин ҳам мезбонлар кўплаб ҳужумлар уюштиришди. Фарруҳ Шотурсунов ва Орипхўжа Абдуҳолиқовнинг зарбаларини рақиблар посбони қайтариб қолди. Меҳмонлар эса мезбонлар дарвозаси олдида хавфли вазият ярата олишмади.

Иккинчи бўлимда эса ўйин сурати ўзгарди. Орипхўжа Абдуҳолиқов ва Муроджон Тўйчибоев 100 фоизлик вазиятдан фойдалана олишмади. "Сен урмасанг, сенга уришади" деганларидек, 73-дақиқада "йўлбарс"лар гол ўтказиб юборишди. Бу паллада Тўлқинжон Умаров бош билан "Нурафшон" дарвозасига йўл топа олди. Шундан кейин Б гуруҳи пешқадамлари олдинга шердек ташланишди.

Ўйин гўёки 1:1 ҳисобида якунига етадигандек кўринаётган бир вақтда барчаси ўзгариб кетди. 86-дақиқада узун тўп узатилишидан кейин зарба берилди. Тўп дарвоза тўсинини топди. Қайтган тўпни эса Орипхўжа Абдуҳолиқов қийинчилик билан дарвозага жойлаб қўйди, 2:1.

Воҳид Холбоевнинг қилган ўзгаришлари ўз самарасини берди. 90-дақиқада захирадан майдонга тушган Руслан Веклич пенальти ишлади. 11 метрлик жаримани эса Абдурасул Комилов аниқ амалга оширди. Ушбу ғалабадан кейин "Нурафшон" жамоаси ўз етакчилигини сақлаб қолди. Орипхўжа Абдуҳолиқов эса мавсумдаги тўққизинчи голини киритди.

Учрашув статистикаси

Бурчак зарбалари: 6 - 2
Пенальти: 1 - 0
Сариқ карточка: 1 - 1
Ҳужумлар: 85 - 68
Ҳафли ҳужумлар: 63- 51
Тўпга эгалик қилиш %: 49 - 51
Дарвозага зарбалар: 17 - 5
Аниқ зарбалар: 8 - 2