Нўъмон Нурматов: "Аниқ мақсад ҳозирча йўқ, аммо учликка киришни режалаштиряпмиз"

- Эркаклар ва аёллар футзал жамоаларида тайёргарлик қандай ўтмоқда?
- Ҳозир янги мавсумга ҳозирлик жараёни бормоқда. Суперлига қачон бошланиши маълум қилинмади, март ойи бошида баҳслар старт олса керак. "Ёшлик" спорт залида машғулот ўтказяпмиз. Машғулотлар ҳафтасига олти кун олиб борилмоқда. Эркаклар футзал жамоаси сафига олти нафар янги ўйинчиларни жалб этдик. Яқин кунларда раҳбарият олдимизга янги мавсум учун вазифани қўяди.

Аёллар жамоасида ҳозирча янги ўйинчилар йўқ. Ўтган йили биринчи лигада тўққиз учрашувда зафар қучиб, учинчи поғонани эгалладик. Бу йил аёллар чемпионатида юқори лигада иштирок этамиз. Айни пайтда янги футболчилар қидириш палласидамиз. Таркибда ёш футболчилар етарли, бироқ тажрибали ўйинчилар кўмагига муҳтожмиз. Аёллар жамоаси ҳар куни ЎФА майдони ва "Ёшлик" залида шуғулланмоқда.

- Футзал жамоасига янги ўйинчилар мослашиб кетишдими?
- Янгилар жамоага яхши киришиб кетишди. Терма жамоага номзод уч футзалчи камроқ шуғулланди. Ҳазратқулов терма жамоа сафида Осиё чемпионатида қатнашяпти. Балки, яна бир неча ўйинчиларни таклиф этишимиз мумкин.

- Тайёргарлик жараёнидан кўнглингиз тўлдими?
- 8 январда тайёргарлик кўришни бошлаганмиз. Барчаси яхши кетмоқда. Таркибни янада кучайтирсак, чемпионлик учун кураш олиб боришимиз мумкин. Рўйхатимизда бир неча футзалчилар бор.

- Янги мавсум олдидан нима кутяпсиз?
- Аниқ мақсад ҳозирча йўқ, аммо учликка киришни режалаштиряпмиз. Олдимизга вазифа қўйилгандан кейин кўп нарса ойдинлашади. Эҳтимол, чемпионлик мақсади қўйилар. Барча юқори ўринда бўлишни хоҳлайди.