Мурод Исмоилов: "Биринчи бўлимдаги ўйинимиз учун узр сўрайман"

- Биринчи навбатда Фарғонадан етиб келган ва бизни ўйин давомида фаол қўллаб-қувватлаб турган мухлисларга миннатдорчилик билдирмоқчиман. Биринчи бўлимдаги ўйинимиз учун узр сўрайман. Ўйлаган нарсаларимизни амалга ошира олмадик. Ҳимоявий футболга тайёргарлик кўргандик. Стандарт вазият ва қарши ҳужумда тўп ўтказиб юборганимизда бизга омад кулиб боқмади.

- Биринчи бўлимда мезбонларнинг қанотдан уюштирган ҳужумларини тўсдик, бироқ бурчак зарбасидан сўнг тўп ўтказдик. Кейин ўйинни ўзгартиришимизга тўғри келди. Ўйин бошида футболчиларда ишонч етишмагандек туюлди. Иккинчи бўлимда кескинроқ ўйнадик. Ҳужумга эътибор беришга ҳаракат қилдик.

- Охирги йилларда жамоамизда кўп ўзгаришлар бўлди. Ҳозир барча жамоага қарши ҳужумкор футбол кўрсатишга тайёр эмасмиз. Сафарда "Пахтакор" ёки "Локомотив" каби меҳмонда ҳам бир нечта ҳужумчи билан ўйнашимизга эрта деб ҳисоблайман. Мавсум узоқ давом этади. Биринчи мағлубиятни қабул қилиб олдик, лекин бу билан ҳаёт тўхтаб олмайди. Руҳий тушкунликка тушмаслик учун интиламиз.