Мундиал-2022. Мухлислар карвони Бокуга етиб борди

Гарчи терма жамоамиз бу мусобақада иштирок эта олмасада, ўзбекистонлик мухлисларни ўз ичига олган карвон Қатарга йўл олмоқда. Бу дегани Жаҳон чемпионати учрашувларида албатта юртимиз байроғини учратасиз. 

5 ноябрь куни Тошкентдан отланган ишқибозлар гуруҳи Тошкент-Самарқанд - Қозоғистон - Озарбайжон - Эрон- БАА-Саудия Арабистони йўналиши орқали Дохага етиб боришади. 

Ҳамюртларимиз бугун Бокуда бўлиб туришибди. Мухлислар карвони етакчиси Абдураҳмон Фозилов бу борада фикрларини билдириб ўтди. 

-  Юк кемасига автомобилларимизни ортдик. Афсуски, ҳозирда Озарбайжондаги вазиятга кўра сувдан, қуруқликдан одамларнинг кириб келиши мумкин эмас. Фақат катта юк ташийдиган кемаларнинг бошқарувчиларига мумкин экан. Йўловчиларга таъқиқланишини айтишди. Биз охиригача ҳаракат қилдик. Қизиқ ҳолати шуки, автомобилларимизни ортиб, чипталарни олиб бугун аэропортга келганимизда кемаларга чиқиш учун рухсат келди. Лекин ҳаммаси ўтиб кетганди. Бундан фойда йўқ эди. Актауга ўрганиб қолгандик. Бу ердаги ватандошларимиз, дўстларимиз билан кўришдик. Айни пайтда Бокудамиз. 

2018 йил Россияда бўлиб ўтган ҳар тўрт йилликнинг нуфузли мусобақасига ҳам бир қанча ишқибозлар автомобилда йўл олганди. Мухлисларимизнинг кундалик жараёнлари, сафар таассуротларини кейинги мақолаларимизда яна батафсил тўхталиб ўтамиз.