Миодраг Радулович: "Ўзбекистон - Ливан учрашуви ҳар иккала томон учун фойдали"

"Аввало шуни айтишим мумкинки, мен Ўзбекистонни жуда ҳурмат қиламан. Эртанги ўйинга келадиган бўлсак, таркибда йўқотишлар мавжуд. Ливан терма жамоасининг 3-4 нафар футболчиларида жароҳат борлиги сабаб уларнинг хизматидан фойдалана олмайман. Шундай бўлсада, бўлажак учрашув жуда қизиқарли ўтишини кутмоқдаман. Мазкур баҳс биз ва рақиб учун фойдали ўйинга айланади.

Ливан ва Ўзбекистон чемпионатларини таққосламаган бўлардим. Чунки Ливанда ярим профессионал жамоалар кўп. Инфраструктура борасида ҳам Ўзбекистон анча илдам", - деди Ливан бош мураббийи Миодраг Радулович.

Ўзбекистон терма жамоасининг ўртоқлик учрашувидаги рақиби Ливан бош мураббийи Миодраг Радулович сўровимизга лаббай дея жавоб қайтарди ва ўйин олдидан ўз фикрлари билан ўртоқлашди.

Аммо Ўзбекистон терма жамоаси бош мураббийи Эктор Купер йиғин ва ўйин олдидан матбуотга ҳеч қандай фикр билдиргани йўқ. Хаттоки ЎФА расмий сайтида ҳам бош мураббийимизнинг фикрлари чоп этилгани йўқ.

Бизга маълум бўлишича, эртанги учрашув олдидан ҳеч қандай матбуот анжумани ташкил этилмаган.