"Милан" "CAFA Nation's Cup-2023"да иштирок этадиган футболчини сотиб олмоқчи

Маълумотларга кўра, "россонери"ларнинг асосий мақсади Маркус Тюрам бўлиб турибди. Менхенгладбахнинг "Боруссия" клубини эркин агент сифатида тарк этаётган футболчида ПСЖдан таклиф бор.

"Милан"дагилар Тюрам қарорини кутишмоқда: Агар у ПСЖга рад жавобини бериб, Италия клубига ўтса, янги мавсумда жамоа у ва Рафаэль Леао атрофида қурилади. Маркус рад жавобини берса, "Милан"да бошқа вариантлар мавжуд.

"Россонери"лар Элдор Шомуродовнинг собиқ жамоадоши, айни дамда "Вест Хэм" шарафини ҳимоя қилаётган Жанлука Скамаккага қизиқиш билдирмоқда. Клуб вакиллари футболчи билан боғланишган, у "Милан"га ижара асосида ўтиши мумкин.

Шу билан бирга "Милан" Эрон терма жамоаси сафида "CAFA Nation's Cup-2023" турнирида иштирок этадиган, сўнгги мавсум Португалия чемпионати тўпурари бўлган "Порту" ҳужумчиси Меҳди Таремига ҳам қизиқмоқда. Португалия клуби ўз футболчисини сотиш ниятида эмас, бироқ 1 йилдан сўнг у эркин агентга айланади.