“Металлург” машғулотларни бошлаб юборди

Икки ойдан кўпроқ вақтни карантинда уйда ўтказган “Металлург” футболчилари ҳамда мураббийлар штаби кеча клуб қароргоҳида тўпланди ва Суперлиганинг 4-тур баҳсларига тайёргарликни бошлаб юборишди.

“Металлург” жамоаси аъзолари клуб қароргоҳига йиғилишдан олдин пойтахтимизнинг Чилонзор туманидаги COVID-19 марказида коронавирус пандемиясига тест таҳлилларини топширишди. Мураббийлар штаби ҳамда футболчиларнинг барчаси соғ саломат, таҳлил натижалари салбий (манфий) эканлиги қайд этилгач, улар клуб қароргоҳига йўл олишди. Кеча куннинг биринчи ярмида жамоа бош шифокори Дилшод Аширов футболчиларни яна бир бор тиббий назоратдан ўтказгач, жисмоний тайёргарликни тиклаш машғулотлари бошлаб юборилди. Таъкидлаш керакки, машғулот тегишли санитария қоидалари, нормалари ва гигиена нормативларига қатъий амал қилган ҳолда ўтказилди.

Ўз навбатида йиғиндан олдин шаҳар Санитария-эпидемиологик осойишталик агентлиги ходимлари томонидан клуб базаси, машғулот ўтказилувчи стадион ҳудуди тўлиқ дезинфекция қилинди. 

Жамоавий машғулотларни соғиниб қолган футболчилар ҳамда мураббийлар штаби илк кунги машғулотлар жараёнини катта кўтаринкилик, уюшқоқлик ҳамда тартиб қоидаларга амал қилинган ҳолда аъло кайфиятда якунлашди.