"Мен учун футболчининг паспорти аҳамиятсиз, "Бунёдкор" конкрет таклиф билан чиқди" — "қалдирғочлар"нинг янги устози Александр Крестинин билан интервью

Крестинин устозлик қилади. Мураббий аллақачон ишни бошлаган, дастлабки кунги машғулотлардан сўнг асосий ва ўринбосарлар жамоалари ўртасида назорат учрашуви ўтказилди. Унда мураббийлар штаби футболчиларнинг ҳолати ва ўринбосарлар таркибидаги бир нечта футболчиларни кузатишди. Мазкур ўйиндан сўнг Александр Крестинин сайтимиз учун интервьюга мамнуният билан рози бўлди ва бир нечта саволларимизга жавоб бериб ўтди. 

- Илк норасмий учрашувни ўтказдингиз. "Бунёдкор"даги илк таассуротлар қандай?

- Бундай катта жамоада ишлаш албатта ёқимли, боз устига ажойиб тарихга эга клубда эканлигим янада катта масъулият юклайди. Тўғри ҳозирги вазиятимизни оддий, деб бўлмайди. Лекин барчасини ўрнига келтириш учун бор кучимизни ишга соламиз. Қиладиган ишларимиз кўп. 

- Аввал ҳам ўзбек клублари билан музокараларга очиқ эканлигингизни айтгансиз. "Бунёдкор" айни сиз кутган таклифми?

- Нафақат ўзбек балки бошқа клублар учун ҳам очиқман. "Бунёдкор" эса айни конкрет таклиф билан чиқди. Шу боис кўп ҳам ўйлаб ўтирмадим. Келишув тезда амалга ошди. 

- Қирғиз футболида яхши натижалар, ёрқин таассуротлар қолдиргансиз. Лекин Ўзбекистон чемпионати даража жиҳатдан бир бош баланд ҳисобланади. Бу ерда ўзингизни кўрсатишингизга ишонасизми?

- Терма жамоадаги натижа билан клубдагини солиштириб бўлмайди.  Фарқи шундаки, клуб билан ҳар ҳафта, терма жамоа билан бир йилда 5-6та учрашув ўтказасиз. Ўзбекистон Суперлигасининг даражаси эса баланд, бу борада баҳслашишга ҳожат йўқ. 

- "Бунёдкор" чемпионатда 8та учрашувдан бери ғалаба қозона олмаяпти. Натижалар қониқарсиз. Бу вазиятдан олиб чиқиб кетиш учун биринчи ишни нимадан бошлайсиз?

- Биринчи даврадаги натижалар бари тарихда қолди. Биз олдинга қараб интилишимиз, керакли очколарни жамғаришимиз керак. Мен жамоада ишлаган олдинги ҳамкасбларимни ишини муҳокама қилишни истамайман. Олдимизга конкрет вазифа қўйилган, натижаларни яхшилашимиз шарт. "Бунёдкор" мавсумни имкон қадар юқорироқ ўринларда тугатиши керак. Бу ерга шунинг учун келганмиз. Ўйлайманки, олдинда турган қийин ва машаққатли вазифаларни биргаликда уддалай оламиз. 

- Футболчиларда ғолиблик руҳи, шижоат йўқолганини ҳисобга олганда руҳий тайёргарлик биринчи планга чиқадими ёки тактик ёндашув?

- Бу комплекс савол. Ҳозирги вазиятда барча йўналишда иш олиб борамиз. Машғулотлар жараёнини яхшилаш орқали йигитларни кайфиятини кўтаришга ҳаракат қиламиз. 

- Кучайтирилиши керак бўлган позициялар борми? Суперлига стартигача янги футболчиларни кўрамизми?

- Қайсидир позицияни кучсиз, демаган бўлардим. Бошқа томондан таркибнинг умумий кўриниши бироз ўзгариши мумкин. Жамоа билан яқиндан танишиб, футболчиларнинг имкониятларини билиб олишим даркор. Шундан кейингина балки янги футболчилар олинар, балки бунга эҳтиёж сезмасмиз. Бу саволга аниқ жавоб бера олмайман. 

- Қирғиз Республикаси терма жамоасида ишлаганингизда ёшларни қўрқмай туширардингиз. "Бунёдкор"да эса бу борада танлов ниҳоятда кенг. Бу сизга таркиб учун қўшимча имконият берадими?

- Мен учун футболчининг паспортининг аҳамияти йўқ. Барча ёшларга эшиклар очиқ. Бу ўзини кўрсатиш учун икки карра куч билан ишлаш дегани. Ўринбосарлар сафида иқтидорли ёш футболчилар кўп. Қолаверса, мураббийлар ҳам улар билан муносиб иш олиб бораётгани кўриниб турибди. Академия бекорга қурилмаган. Табиийки, академия тарбияланувчиларига эътибор қаратилади. 

- Футболчиларнинг имкониятидан келиб чиқиб тактика танлайсизми ёки тактикангиздан келиб чиқиб футболчиларни жалб қиласизми?

- Йўқ. Қўл остимдаги футболчилардан келиб чиқиб керакли тактикани танлайман. Штабим билан уларнинг сифатларини, имкониятларини ўрганамиз. Футболчилар ёмон эмас. Бу йигитлар билан ўйлаганларимизни амалга ошира оламиз. 

- Жамоа биринчи даврада узоқ вақт кўпроқ ҳимоявий ўйин кўрсатди. Уларни ҳужумкор ўйинга қайтаришда муаммо бўлмайдими?

- Вазифа, кўрсатмалар қандай бўлганини билмайман. Бу борада муаммо кўрмаяпман. 

- Иккинчи даврадан нима кутяпсиз?

- Ҳар бир жамоа турнир жадвалида қаттиқ курашмоқда. Иккинчи давра ҳам бундан кам ўтмайди.