«Локомотив»: 1-давра таҳлили

Темирйўлчилар ўтказилган 13 ўйиндан 10 тасида ғалабага эришган бўлса, икки бор рақиблари билан муросага келишди. Фақат битта ўйинда, яъни сафарда Қаршининг «Насаф» жамоасига имконият бой берилди. 1-даврада жамоа 32 очко жамғарди. «Локомотив» ҳеч қачон мавсумнинг биринчи ярмини бу қадар муваффақиятли ўтказмаган эди.

«Локо» футболчилари ўз майдонида ўтказилган барча 7 ўйинда ғалаба нашидасини суришди ва бу борада жамоамиз Олий лига вакиллари орасида энг яхши кўрсаткичга эга бўлиб турибди. Уйдаги ўйинларда «Локомотив» икки бора йирик ҳисобда («Бухоро» - 5:1, «Шўртан» - 3:0) ғалабага эришган. Темирйўлчилар ўз майдонида 21 очко жамғаришган. Сафар ўйинларида эса 11 очко қўлга киритилди: 3 ғалаба, 2 дуранг ва бир мағлубият. Дарвоқе, Гулистонда жамоамиз майдон эгаларидан йирик 1:5 ҳисобида устун келишди ва бу миллий чемпионатимизда сафар учрашувларида қайд этилган энг йирик ҳисоб бўлиб турибди.

1-давра ўйинлари давомида жамоа футболчилари ҳакамлар томонидан жами 19 бор сариқ карточка билан жазоланишди (ўртача ҳар бир ўйинга 0,7та карточка тўғри келади). Майдондаги интизом борасида «Локомотив» бу йил сезиларли ўсишга эришди. Ортда қолган 13 ўйинда биронта ҳам футболчи майдонни шерикларидан барвақт тарк этмаган.

Жамоамиз ҳужумчиси Фарҳод Тожиев 1-даврада рақиблар дарвозасини 17 марта ишғол қилди. У киритилган голларнинг 15тасини ўйиндан, 2тасини пенальтидан киритди. Кичик Тожиев икки бор хет-трэк қайд этган бўлса, 4 марта дублга эришди. Умуман, «Локомотив» футболчилари мавсумнинг биринчи ярмида рақиблари дарвозасига 33 та гол уришди. Шу голлардан биттасини «Гулистон» вакили Жасурбек Отажонов ўз дарвозасига киритиб қўйди.

Мавсумнинг биринчи ярмида «Локомотив» мураббийлари жами 19 нафар ўйинчи хизматидан фойдаланишди. Бу жамоа ўзаги шакллангани ва асосий таркиб ўйинчилари мавсумни кўтаринки руҳда ўтказишаётганидан дарак беради. Жамоа сафида энг кўп ўйин ўтказган футболчилар сифатида Павел Бугало, Ислом Иномов, Ислом Тўхтахўжаев ҳамда Дилшод Жабборовларни айтиш мумкин. Улар барча 13 ўйинни тўлиқ ўтказишган. Акмал Холматов, Фарҳод Тожиев, Виктор Карпенко, Садриддин Абдуллаев ва Жасур Ҳасановлар ҳам барча 13 ўйинда майдонга тушишган. Фақат, улар айрим ўйинларда заҳирадан тушган ёки заҳирадаги футболчига алмаштирилган. Асосий таркибдан атиги икки нафар футболчи (Александр Шадрин 90 дақиқа, Алан Кусов 18 дақиқа) биттадан ўйин ўтказган бўлса-да, уларга ўз номига гол ёзиб қўйиш учун ана шу вақт етарли бўлгани эътиборга молик.

Қуйида «Локомотив» жамоаси асосий таркиб футболчиларининг 1-давра статистикаси билан танишасиз:

№	Ўйинчи	Амп.	Ўйин	Дақ.	Гол	СК/ҚК
1.	Павел Бугало	Дар.	13	1170	0	1
2.	ДилшодЖабборов	Я/ҳим.	13	1170	0	1
3.	ИсломИномов	Ҳим.	13	1170	0	4
4.	ИсломТўхтахўжаев	Ҳим.	13	1170	0	1
5.	АкмалХолматов	Я/ҳим.	13	1031	4	0
6.	Фарҳод Тожиев	Ҳуж.	13	1006	17	2
7.	Виктор Карпенко	Я/ҳим.	13	952	1	1
8.	Садриддин Абдуллаев	Я/ҳим.	13	891	1	1
9.	ЖасурҲасанов	Я/ҳим.	13	670	0	0
10.	Иван Нагаев	Ҳуж.	12	533	3	2
11.	Салим Мустафоев	Ҳим.	11	893	0	2
12.	СанжарТурсунов	Я/ҳим.	11	616	0	1
13.	Зайниддин Тожиев	Ҳуж.	9	320	4	1
14.	Шерзод Шарипов	Ҳим.	8	609	0	1
15.	Дилшод Рахматуллаев	Я/ҳим.	5	151	0	1
16.	Бобурбек Йўлдошев	Ҳим.	4	360	0	0
17.	Павел Смоляченко	Я/ҳим.	2	50	0	0
18.	Александр Шадрин	Ҳуж.	1	90	1	0
19.	Алан Кусов	Я/ҳим.	1	18	1	0