Лочин Гулдаев топилмалари ёхуд Ўзбекистон U-23 таркибидаги андижонлик футболчилар ҳақида икки оғиз

Қувонарлиси Ўзбекистон U-23 терма жамоамиз япониялик тенгқурларига қарши кечган баҳсда 2:0 ҳисобида ишончли ғалабани қўлга киритиб, финалга йўл олди.

Ушбу тарихий ғалабага айланган ўйин нафақат Ўзбекистон учун балки Андижон футбол академияси учун ҳам алоҳида аҳамият касб этади десак муболаға бўлмайди. Сабаби ушбу даргоҳда футболнинг илк сир-асрорларини ўрганган ҳимоячи Одилбек Абдумажидов билан ҳужумкор ярим ҳимоячи Алишер Одилов бугун терма жамоа сафида майдонга тушиб, мамлакатимиз шарафини муносиб ҳимоя қилди. Айниқса Абдумажидов бутун ўйин давомида мудофаа чизиғида бехато харакат қилиб, рақиб ўйинчиларига имконият бермади. Шунингдек захирадан майдонга тушган Алишер Одилов ҳам ўнг қанотда тезкор харакатларини ишга солиб, японияликларни саросимада ушлаб турди.

Абдумажидов ва Одилов юқорида айтиб ўтганимиздек Андижон футбол академияси тарбияланувчилари ҳисобланади. Кези келганда шуни ҳам айтиб ўтиш ўринлики, U-23 терма жамоамизнинг ушбу икки нафар аъзоси мураббий Лочин Гулдаев шогирдлари ҳисобланади. 

"Ростини айтсам, U-23 терма жамоамизнинг мусобақадаги ҳар бир учрашувини юқори иштиёқ ва катта хаяжон билан кузатиб бордим. Албатта терма жамоамиз таркибида икки нафар шогирдим ўрин олгани мени жуда қувонтирди. Одилбек ва Алишер билан доимий алоқада бўлиб турамиз. Ҳар бир ўйиндан аввал уларга масофадан туриб бўлсада, омад тилаб, дуода бўламиз. Баракалла, йигитлар ўзларини ҳар томонлама ижобий кўрсата олди. Япония билан ўйинни Андижон футбол академиясида бугунги кундаги шогирдларимиз билан катта экран орқали кузатиб бордик. 2:0 ҳисобидаги ғалаба барчамизни тўлқинлантириб юборди. Мен ўз шогирдларим билан фахрланаман", - дейди Лочин Гулдаев.

Маълумот учун, Алишер Одилов Андижон вилоятининг Олтинкўл туманида таваллуд топган. Ҳозирда Олимпик жамоаси шарафини ҳимоя қилаётган бўлса Одилбек Абдумажидов Андижон шаҳрида туғилган. Марказий ҳимоячи фаолиятини Қозоғистоннинг "Ордабаси" клубида давом эттирмоқда.