"Ливерпуль"нинг даражаси, жамоалар ҳолати, потенциал чемпионлик - Сульшер ўйиндан олдинги матбуот анжуманида қатнашди

Ўйин ҳақида

"Бундай юқори сифатга эга бўлган жамоага қарши ўйинни сабрсизлик билан кутяпман. "Энфилд"га келганингда сенинг қандай ҳолатда эканлигинг муҳим эмас - бу барча учун жуда катта ўйин. Тўғриси, сабрим чидамаяпти".

Турнир жадвалидаги ўрин

"Мавсумнинг бундай қисмида пешқадамлик ҳеч нимани бермайди. Шундай экан табриклар шарт эмас. Сўнгги турда қайси ўринда бўлишимиз биз учун муҳимроқ".

Жамоа кучли

"Жамоам яхши ҳолатда. Юқори тажрибага эга кўплаб футболчиларим бор. Ундан ташқари, жамоани кучайтиряпмиз. Аарон, Дэн, Харри – улар анчадан бери шу ерда ва клубнинг стандартларини, босимини тушуниб бўлишди. Шак-шубхасиз, биз кучайдик".

Мураббий сифатидаги энг катта ўйин

"Албатта! Турнир жадвалидаги ўрин бизга куч бериши керак. Чемпионга қарши "Энфилд"да ўйин - ҳақиқий катта имтихон"

Потенциал чемпионлик ҳақида

"Маркус айтганидек, кейинчалик қуйи ўринларга тушиб кетсак ҳам унчалик хайрон қолмайман. Жамоам жуда ёш. Бизнинг амбициямиз чемпионлик эмас, шунчаки, ғалабаларга эришиш. Ютяпмизми, демак, тўғри йўлдан кетяпмиз. Олдимиздаги ўйин эса бизнинг қандай ҳолатда эканлигимизни кўрсатиб беради".

Клоппнинг ўзини тутиши ҳақида

"Ўйин вақтида мен клубнинг расмий шахси сифатида унга жавоб қайтаришим керакми? Бу менинг ишим эмас. У ҳам расмий шахс. Улар ҳам ўзларининг ишларини жуда яхши билишади. Юргенни қаттиқ ҳурмат қиламан. Ўйинлар давомида у билан ҳали бирор муаммо бўлганича йўқ"

Жамоанинг ҳолати ҳақида

"Ливерпуль"да жароҳатлар кўп бўлса-да, биз ўзимизни омадли деб ҳисобламаймиз. Бизда ҳам жароҳатлар етарлича. Футбол шундай - жароҳатлардан қоча олмайсиз. Эртага футболчилар тестдан ўтишади ва ўйинга тайёргарликнинг яна бир қисмидан ўтамиз. "Бернли"га қарши ўйиндан кейин лат еган бир неча футболчиларим бор. Уларнинг майдонга тушишинин кафолат бера олмайман".

Қайтараман, бу ўйинда жамоаларнинг қандай ҳолатда эканлиги инобатга олинмайди, баҳоналар ўтмайди. Ўзимизга ишоняпмиз. Биз совринга даъвогарлармиз, улар эса - амалдаги чемпионлар. Ўйинда қандай натижа қайд этилишини тахмин қила олмайман, муҳими, якунда ижобий кайфиятда бўлишни истайман".

Совринни ҳимоя қилиш ҳақида

"Юнайтед"да футболчи бўлиб ўйнаб юрган кезларимда амалдаги чемпион сифатида майдонга тушсак, ҳар бир учрашув биз учун финал каби ўтарди. Чунки ҳамма жамоалар чемпионни ютишни исташади. "Ливерпуль"да ҳам ҳолат шундай. "Энфилд"га ўзимизнинг энг яхши ўйинимизни кўрсатиш учун келяпмиз"

"Ливерпуль"нинг даражаси ҳақида

"Ўтган йилгига қараганда яхшироқ ҳолатдамиз. Ўтган мавсумда ван Дейкнинг боши билан йўллаган зарбаси ва қарши ҳужумдан гол ўтказиб юборганмиз. Лекин жамоалар тенг ўйин намойиш қилишганди. Ушбу мавсумдаги турнир жадвалига қарасак, биз уларга рақобат қила оладиган даражага кела олдик. Ўтган мавсумда барчаси қийин эди. Айни дамда бирданига 6-7 жамоа пешқадамлик учун давогарлик қилаётган бўлса, ўтган мавсумда улар сони иккита эди".

Ғалаба қозонган жамоа пешқадам бўлади

"Ҳар бир жамоа ўйинга ғалаба учун майдонга тушади. Биз ҳам бир кун келиб, "Ливерпуль"ни ютармиз. Аммо ҳозирда биз ҳам юқори иштиёқдамиз. Балкик юта олмасмиз. Аммо "Ливерпуль"нинг имтихонидан ўтишга ҳаракат қиламиз".