"Кучли-учлик"дан тушмаётган икки жамоа (ФОТО)

Қаршининг "Насаф" жамоаси Рўзиқул Бердиев қўл остига ўтганидан буён совриндорлар рўйхатидан тушиб қолмаяпти.
"Аждарлар" кетма-кет тўрт маротаба бронза медалларини қўлга киритишди ва жорий мавсумда кумуш медалларига эга чиқишди. Шу тариқа қаршиликлар Бердиев бошчилигида ҳар сафар мавсумни совриндор сифатида якунлашмоқда.

Тошкентнинг "Локомотив" жамоаси сўнгги олтита мавсумни анча муваффақиятли ўтказмоқда.
"Темирйўлчилар" 2012 йилдан буён "кучли-учлик"даги ўринларини ҳеч кимга беришмаяпти. "Локомотив" жамоаси барча совринларга босқичма-босқич, аста-секинлик билан эришди.

Дастлаб жамоа 2012 йили бронза медалларини нақд қилганди. Кейинчалик икки мавсум (2013, 2014, 2015) мамлакат чемпионатининг кумуш медалларига сазовор бўлишди.
Охирги икки мавсумда эса жамоа чемпионлик шоҳсупасидан пастга тушмаяпти.

Шуни алоҳида қайд этиш керакки, бу икки жамоалар ушбу мавсумлар оралиғида Ўзбекистон кубоги соҳиби бўлишга ҳам улгуришди. "Локомотив" 2014 ҳамда 2016 йиллари кубокка эгалик қилган бўлса, "Насаф" 2015 йилда ўз тарихида илк бор Ўзбекистон кубоги соҳибига айланганди.

Чемпионатимизнинг охирги 5 йиллигидаги энг барқарор жамоа сифатида айнан "Локомотив" ҳамда "Насаф"ни эътироф этиш мумкин.