Жасур Яхшибоев: "Сўғдиёна" натижа учун ҳаракат қилди, биз эса ғалаба қозондик"

Ушбу турда Тошкентнинг "Пахтакор" жамоаси ўз уйида Жиззахнинг "Сўғдиёна" жамоасини қабул қилиб 2:0 ҳисобида ғалаба қозонди. Ушбу учрашувдан сўнг "Пахтакор" клуби футболчиси Жасур Яхшибоев ўз фикрларини билдириб ўтди.

"Жамоавий ўйин эвазига "Сўғдиёна"ни мағлубиятга учратдик. "Сўғдиёна" жамоаси бизга қарши жуда ҳам кучли қаршилик кўрсатди. Жиззахликлар бизга қарши яхши тайёргарлик кўрган экан. "Сўғдиёна" натижа учун ҳаракат қилди, лекин биз яратилган вазиятлардан унумли фойдаланганимиз учун ғалаба қозондик. Ўйин давомида кўпроқ ўзимга ишониб, рақиб футболчиларини алдашга киришиб кетдим. 

Лекин майдонга чиқишимдан олдин, жамоага фойдам тегса ва ғалабага ўз хиссамни қўшсам шуни ўзи етарли, дея ўз олдимга мақсад қўяман. Кейинги турда жуда ҳам кучли бўлган рақиб "Бунёдкор" жамоасига қарши баҳс олиб борамиз. Ушбу ўйинда ким руҳан, жисмонан ва техник томондан кучли бўлса ўша жамоа ғалаба қозонади, деб ўйлайман. Биз мухлисларимизни хурсанд қилишга ҳаракат қиламиз. "Бунёдкор" жамоаси қарши ҳужумда хавфли ўйин намойиш этади. Биз мана шу қарши ҳужумга тайёр бўлишимиз керак", - дейди Жасур Яхшибоев

Жаҳонгир Сотволдиев ёзиб олди