Иброҳим Танко: "Ўзбекистон бизнинг хатоларимиз эвазига ғалаба қозонди"

Унга баҳсда гол урган Иссаку Абдул Фатаву ҳамроҳлик қилди. 

"Бугун иккала жамоа ҳам яхши ўйнади. Биз иккита жиддий хатога йўл қўйдик ва рақиб голлар урди. Йигитларим ҳисобни тенглаштиришга ўзларида куч топа олишди. Ўзбекистон терма жамоасини ғалаба билан табриклайман", - дейди Иброҳим Танко. 

"Жуда ҳам ажойиб учрашув бўлди. Ўзбекистон бизнинг хатоларимиз туфайли ғалаба қозонди. Бу ерда ўйнаганимиздан хурсандмиз. Ўйлашимча бу иккала жамоа учун фойдали бўлди", - дейди Фатаву.

- Ўзбекистон сафида кимни алоҳида ажратиб кўрсата оласиз? 

- Мен рақиб сафидаги қайсидир футболчини ажратиб кўрсатишни ёқтирмайман. Тўғри Ўзбекистон сафида 3-4 нафар футболчи ажралиб турди. Буни кеча ҳам айтгандим. Бугунги ғалаба жамоавий ўйин менда яхши таассурот қолдирди. 

- Учрашув тўлиғича Ўзбекистон ташаббуси остида ўтди. Бунга тайёрмидингиз? 

- Бу табиий ҳолат. Ўзбекистон ўз майдонида ўйнади, шунчалик кўп мухлислар қаршисида ўйнади. Тўп назорати ҳам улар томонида бўлди. Лекин мен шогирдларим билан фахрланаман. Гол ўтказиб юборгач ҳисобни тенглаштира олганимиздан хурсандман. 

- Ўзбекистон, Наманган шаҳри сизда қандай таассурот қолдирди? 

- Ўзбек халқи меҳмондўст сифатида таассурот қолдирди. Ўзим ҳам мусулмонман, меҳмондўстлик бу мусулмон халқларига хос бўлган ҳусусият. Рақиб майдонида ўйнаганда одатда меҳмон жамоа футболчиларига қарши мухлислик қилинади. Бугун эса стадион иккала жамоани бирдек қўллаб қувватлади. Шу боис учрашувдан кейин мухлисларга миннатдорчилик билдирдик.